Inuunermi naleqartitat atugarissaarnerlu pillugu apersorneqarusuttut ujaarineqarput

Nuummiut inuunermi nalillit suunerannik pillugu sapaatip-akunnerata tulliani oqaluttuarusussinnaasut, Naja Carina Steenholdtip ujartorpai.

Taanna Kujataanut, Tunumut, Qeqqata Kommunianut avannaanullu upernaaq mannali angalavoq, innuttaasut 100-t pallillugit inuunermi naleqartitat pillugit apersorlugit.

Naja Carina Steenholdtip ilisimatusaataata taaguutaa tassaavoq "Perspektiver på livskvalitet og trivsel i Grønland", Nuummilu innuttaasut inuunermi naleqartitatik pillugit ataasinngornermi decembarip ulluisa aappaanniit arfernata tungaanut apersorneqarnissamut kajumittut apersorneqarsinnaassallutik.

Inuit 18-it 65-illu akornanni ukiullit apersorneqarnissaat pilersaarutaavoq, apersuinerlu akunnerup affaata missaanik sivisussuseqassangatinneqarluni. Apersuinerup nalaani nutserisoqarsinnaassaaq.

Naja Carina Steenholdtip ilisimatusaataa Ilisimatusarfiup Aalborg Universitetillu suleqatigiinneratigut piviusunngorpoq, Naja Carina Steenholdtillu Nuummut ornigulluni sulinerata naammassineqarnissaa pilersaarutaalluni.

Naja Carina Steenholdt Facebookikkut attaveqarfigineqarsinnaavoq imaluunniit email-ikkut: naks@uni.gl