Aningaasarsiat qaffattut tapilli peertut: Perorsaasut isumaqatigiissummut angertoqartut naaggaartoqartullu
![](/sites/default/files/styles/image_934x467/public/article_images/dsc01984.jpg?itok=R9YR1Qp1)
Perorsaasut 400-it aningaasarsiatik naammaginagit siorna septembarimi akerliussutsimik takutitsipput.
Perorsaasut aningaasarsiaat isumaginninnermi siunnersortit aningaasarsiaannit ukiumut 90.000 koruuninik ikinnerupput.
Aningaasaqarnermut naalakkersuisoq Vittus Qujaukitsoq taamani oqaaseqartunut ilaavoq.
AAMMA ATUARUK Perorsaasut akissaatit pillugit taasileruttortut: Siulittaasoq nipaattuarsinnarpoq
- Iliuuseqarfigisariaqakkagut Kommunit peqatigalugit qimerloortariaqarpagut, taanna oqarpoq.
Illuatungeriilli decembarimi 2020-mi atsioqatigiikkamik isumaqatigiissutip imaa oqaluttuariumanngilaat.
Taannalu ilaasortat kingusinnerpaamik aqagu tallimanngornermi isummerfigissavaat.
AAMMA ATUARUK Perorsaasut, Kommunit Namminersorlutillu Oqartussat akissarsiat pillugit isumaqatigiissuteqarput
Perorsaasulli qanoq isumaqarfigaat. Ilaasortat ilaannit oqaloqateqarpugut.
Qaqortumi najugalik, Sussi Larsen ulloq unnuarlu angerlarsimaffimmi sulisutut eqqugaasutut misigivoq.
- Paasisakka malillugit unnuakkut tapeq, perorsaasut unnuakkut sineqartannginnamik tapisiaqaannartaramik, taanna tapeq peerniaraat.
- Perorsaasut bagtvagtit, tassa sillimasutut angerlarsimaffimminni, tapisisarnerat tiimimut akeqartarnerat peerniarpaat, qaammammullu aalajangersimasumik taarsiniarpaat, Sussi Larsen oqarpoq.
Naallu paaqqinnittarfiit ullukkuinnaq ammasartut qaffaavigineqarneri takusinnaagaluarlugu, perorsaasunillu amigaateqarnerat iliuuseqarfigineqalertut qujarukkaluarlugit, taamaattoq isumaqatigiissummut akuerseqataanngitsunut ilaavoq.
AAMMA ATUARUK Perorsaasoq akerliussutsimik takutitsereernermi: Suliumajunnaariaannaavugut
- Isumaqatigiissummut naaggaartunut ilaavunga.
Isumaqatigiissutillu NPK-miit nassiussat imaasa paasiuminaannerat aamma uparuarpaa.
Isumaqatigiissulli aamma nuannaarutigineqarpoq. Isumaqatigiissutaasullu kusagalugit, Nuummi perorsaasoq, Hansine Kristensen oqarpoq.
- Pitsaaqutai tassaapput: perorsaasut akissarsiaannut tunngatillugu sivisuumik nikinnikuunnginnamik taakku qaffaatissaat pitsaaqutigivai, Hansine Kristensen oqarpoq.
Akissarsiallu qaffaavigineqarneri iluarisimaarlugit taanna oqarpoq.
- Aappi, iluarisimaarpakka.
Taassumali aningaasarsiat qanoq qafftsiginersut KNR-imut oqaluttuariumanngilaa. Taasinermi qaangiutsinnagu ilaasortat tamatuminnga isertuussissasut, kattuffiat kaammattuivoq.
TAmanna perorsaasut arlallit KNR-imut uppernarsarpaat. Aamma siulittaasuata isumaqatigiissummi suut ilaanersut oqaluttuariumanngilaa.