Perorsaasut, Kommunit Namminersorlutillu Oqartussat akissarsiat pillugit isumaqatigiissuteqarput
![](/sites/default/files/styles/image_934x467/public/article_images/underskrift_-paedagoger.jpg?itok=jenUVFXf)
Namminersorlutik Oqartussat aamma Nunatsinni Perorsaasut Kattuffiat NPK ukiunut tulliuttunut sisamanut atuuttussamik isumaqatigiissuteqarput.
Isumaqatigiissut 31 marts 2024 tungaanut atuutissaaq.
Isumaqatigiissuteqarnermi perorsaasut 550 missaannik amerlatigisut pineqarput, tassani akissarsiap pisissutaasinnaasup annertuumik annertuseriarnera ilaatigut isumaqatigiissummi qulakkeerneqarluni, Namminersorlutik Oqartussat tallimanngornermi unnukkut tusagassiuutinut nalunaaruteqarlutik taama allapput.
Pingaartinneqarsimasorlu, perorsaasut meeqqat pillugit nalunaarsuisarnermut allaffissornissamut piffissamik immikkoorsitsivigineqarnerat qulakkeerneqarpoq.
Aammattaaq immikkut sulinngiffeqarnissat ullormik ataatsimik ilaneqarput, taakku ukiumut ullut tallimanngortinneqarlutik.
Ukioqqortusisimaneq pillugu sulinngiffeqarsinnaaneq aammalu ernereersimanerup kingorna sulinngiffeqarnermi sapaatip akunnerini kingullerni sisamaasuni tamakkiisumik akissarsiaqarneq qulakkeerneqarput.
Illuatungeriit isumaqatigiissummik nammagisimaarinninnertik unnersiutigigaat, Namminersorlutik Oqartussat tugassiuutinut nalunaaruteqarlutik taama allapput.
Aningaasaqarnermut Naalakkersuisoq, Vittus Qujaukitsoq, isumaqatigiittoqarnera nuannaarutigeqalugulu naammagisimaarinnippoq,
"Perorsaasut sullitaminnut sullissinerat inuiaqatigiinnut pingaaruteqarluinnarpoq, tamannalu pissusissamisoorsoralugulu eqqortuusoraara, isumaqatigiissummi aaqqiissutissat sulianut naapertuunnerat isumaqatigiissutigineqartuni takuneqarsinnaammat.” -Vittus Qujaukitsoq taama oqarpoq.
Nunatsinni Perorsaasut Kattuffianni siulittaasoq, Arnaq Brønlund isumaqatigiissut pillugu ataasinngorpat aatsaat oqaaseqarsinnaalluni KNR-mut ullumi taama oqarpoq.