Perorsaasoq akerliussutsimik takutitsereernermi: Suliumajunnaariaannaavugut
Nuummi akerliussutsimik takutitsinermut aaqqissueqataasoq, Lily Mikaelsen, oqariartuutertik, tassalu aningaasarsiamik qaffannissaat qinikkanit isumaqataaffigineqartoq KNR-imut oqarpoq.
- Ataaseqanngilaq isumaqataanngitsunik. Aamma pinngitsoorsinnaanata tapersersorsuaarpaatigut sulilluarnissatsinnik kissaalluta.
Taava aningaasarsiassi qaffanneqarnissaannut tamarmik isumaqataapput?
Ilaana, ilaanarujussuaq, ukiuni 34-ini inunnik isumaginninnermik sulisoq, Lily Mikaelsen oqarpoq.
AAMMA ATUARUK Perorsaasut aningaasarsiaginnerujumallutik akerliussutsimik takutitsilersut
Inuit 500-it missaat Nuummi akerliussutsimik takutitsinermi peqataasut taanna oqarpoq.
Suliumajunnaarsinnaasut
Perorsaasunngorlaat qaammammut suli akileraaratik 20.588 koruunisisarput.
Ukiuni arfineq-pingasuni sulereernermi 22.339 koruuninut qaffattarpoq.
Ulluunerani paaqqinnittarfimmi pisortat suli akileraaratik 23.491 koruunisisarput.
Ukiut arfineq-pingasut sulereernermi 26.224 koruuninut qaffattarput.
Perorsaasut aningaasarsiaat sulinermilu atugassaat pillugit maanna isumaqatiginniartoqarpoq.
Aningaasarsiamillu qaffaavigineqarnerat anguneqanngippat suliumajunnaarnissartik suli aalajangiusimavaat.
- Soorunami naapeqqissaagut isumasioqatingeeqqillutalu, qularnanngilaq suliumajunnaarnissaq aaqqissuutissagipput, Lily Mikaelsen oqarpoq.
