Perorsaasut akissaatit pillugit taasileruttortut: Siulittaasoq nipaattuarsinnarpoq
![](/sites/default/files/styles/image_934x467/public/article_images/dsc01992.jpg?itok=NFhcykY1)
Namminersorlutik Oqartussat aamma Nunatsinni Perorsaasut Kattuffiat NPK ukiunut tulliuttunut sisamanut atuuttussamik isumaqatigiissuteqarput.
Isumaqatigiissuteqarnermi perorsaasut 550 missaannik amerlatigisut pineqarput, tassani akissarsiat pisissutaasinnaasut malunnartumik pitsanngoriartut, Namminersorlutik Oqartussat decembarimi tusagassiuutinut nalunaaruteqarput.
NPK-p siulittaasuata isumaqatigiissutip imai taamanili oqaluttuariumanngilai.
Isumaqatigiissutilli qanoq imaqarnersoq paasiuminaannerarlugu kattuffitsik ammanerusumik pissusilersortariaqartoq, perorsaasoq Angutínnguaq Johnsen isumaqarpoq.
- Paasitsitiniaallutik suna isumaqatigiissutaava. Qanoq isumaqatigiissutigut annertutigippat.
Taassuma Inatsisartunut 2018-imi qinersinissaq sioqqullugu oqallinneq eqqaasitsissutigaa:
- Partiit tamakkerlugit ataatsimiisikkatsigit, akissarsiagut minnerpaamik 5.000 koruuninik qaffassasut neriorsornikuuaatigut. Soorunami taakkua anguneqanngillat.
Angutínnguaq Johnsen taama oqarpoq.
NPK-lli siulittaasuata Arnaq Brønlundip isumaqatigiissutaasup qanoq imaqarneranik oqaluttuarusunnginnini attatiinnarlugu KNR-imut ilisimatitsivoq.
NPK-imut ilaasortanut taasitsitisoqarnera naammassitinnagu tamanut oqaluttuarisinnaanagu taanna oqarpoq.
- Taakku massakkoqqissaaq avammut oqaatigisinnaanngilakka, ilaasortat taakkuupput naalagaanerpaat, aap naamimilluunniit taasisut.