Qulaarpaa Aningaasaqarneq suliassaqarfinnit nutaanit pingaarnerutinneqarli

Suliassaqarfiit nutaat oqartussaaffigilernissaat pinnagu ataatsimoortumik tapiissutinit isumalluuteqarunnaarnissaq Naalakkersuisunit sulissutigineqartuuppat tamanna innuttaasunut iluaqutissartaqarnerussagaluarpoq. Aningaasaqarneq pillugu professori taama isumaqarpoq.
Assi © : Lars Lund
decembarip 05-at 2016 13:58
Nutserisoq Simon Uldum -

Suliassaqarfiit oqartussaaffigilernissaat kisiat samminaveersaarneqassaaq. Lektori soraarneq Lars Lund taama oqarpoq.

Aningaasatigut imminut napatilernissamut aqqutissanik marlunnik tikkuagaqarpoq. Siulleq tassaavoq suliassaqarfiit oqartussaaffigilernissaat. Aappaalu tassaavoq ataatsimoortumik tapiissutinik isumalluuteqarnerup millisinnissaa.

Suliassaqarfiilli oqartussaaffigilernissaannut tunngatillugu ataatsimik ajornartorsiuteqarpoq.

- Kalaallit Nunaanni ilinniarsimasunik amigaateqartoqarnera tamatta nalunngilarput, taamaammat allaffissornermi nukissatigut amigaateqartoqareerpoq, Lars Lund oqarpoq.

Suliassaqarfiillu amerlanerit, Kalaallit Nunaanni allaffissornikkut isumagisassat oqartussaaffigineqalissappata suli annerusumik siammarneqartariaqalissapput.

Suliassaqarfiit nutaat akeqarput

Suliassat taakkorpiaat isumagineqassappata, sulisussanik tikisitanik pisariaqartitsineq taamaaginnassaaq. Nutaartaali tassaassaaq akiligassartaa Danmarkimit akilerneqarani Kalaallit Nunaannit akilerneqartussanngussammat.

Taamaammat Lars Lund isumaqarpoq suliassaareersut sammineqarnerusariaqartut taakkulu naammassinissaannut pikkorinneruffigalugu.

- Taamaaliornikkummi siunissamut aqqutissaq pitsaanerusoq pinngitsoorani anguneqassaaq, suliassaqarfiit oqartussaaffigilernissaat tuaviuutiinnarnagu. Taakkununngami aningaasanik malinnaatitsisoqassanngilaq, professori oqarpoq.

Namminiilivinnissap innuttaasut siunissami taasitinneqarnerisigut isummerfigineqarnissaa professorip aamma erseqqissaatigaa.

Aningaasatigut allanik isumalluuteqannginnissaq sammineqarneruppat tamanna kiffaanngissuseqarnerulersitsissaaq

Taamaammat isumaqarpoq ataatsimoortumik tapiissutit isumalluutigiunnaarnissaat sammineqarnerusariaqartoq, siunissami innuttaasunut tamanna kiffaanngissuseqarnerulersitsissammat, suliassaqarfiit maannangaaq oqartussaaffigilerneqanngippata.

- Suliassaqarfiit oqartussaaffigilernissaat nukingiunneqartariaqanngilaq. Ataatsimoortumik tapiissutinik isumalluuteqarneq millisikkaanni, aamma aningaasatigut allanik isumalluuteqarneq millisinneqassaaq tamatumunngalu peqatigitillugu aamma suut pillugit aalajangiinissamut periarfissat pigiinnarneqassallutik.

Naalakkersuisulli politikkiminni suliassaqarfiit oqartussaaffigilernissaannik sulissuteqarnissaq ullumikkut pingaarnerutippaat.