Assi: Camilla Dam/KNR

Siumut: Namminersulivinnissaq aningaasaqarnitta unammillernartoqartippaa

Kim Kielsenip ukiortaami oqalugiaataa Nunatta namminersulivinnissaanut periarfissanik eqqartuerpiannginnera illuatungiliuttut mamiagaat - Jens-Erik Kirkegaardip Siumumeersup tamanna akerlilerpaa.

Naalakkersuisut siulittaasuata ukiortaami oqalugiaataa namminersulivinnissaq pillugu imaqarnerusariaqaraluartoq illuatungiliuttut Inuit Ataqatigiit Partii Naleqqallu isornartorsiorpaat.

-Namminersulereeratta, namminiilivinnissatta tungaanut suliassat tamaavitta ataasiakkaatut tigusariaqarpavut, aamma naalakkersuinikkut. Taamaammat uani pingaaruteqartorujussuuvoq, nunap nammineq inuussutissarsiornera sallertut nukittorsassallugu. Taannalu oqalugiaammi sammineqanngilaq, Inuit Ataqatigiit politikkikkut oqaaseqartartuat, Aqqaluaq B. Egede, oqarpoq.

Unammilligassat allat pingaarnerupput

Unammilligassalli allat siulliunneqaqqaartariaqartut Siumumi politikkikkut oqaaseqartartoq Jens-Erik Kirkegaard isumaqarpoq.

Aamma atuaruk Illuatungiliuttut Naalakkersuisut siulittaasuata oqalugiaataa amigaateqarsoraat

Namminersulivinnissarli eqqartorneqartinnagu Nunatsinni unammilligassat salliunneqartariaqartut Siumumi politikkikkut oqaaseqartartoq Jens-Erik Kirkegaard isumaqarpoq.

- Nunarput suup tungaanut ingerlaarnersoq nalunngilarput, namminiilivikkiartuaarpugut. Taammaattoq aamma Naalakkersuisut siulittaasuata oqalugiiaammini piffissaq qanittoq isigalugu unammilligassagut annertuut eqqartorai isumaqarpunga piviusorsiortuusoq, Jens-Erik Kirkegaard oqarpoq. nangipporlu:

- Nalunngilarput Nunatta karsia angakkuangaanngitsoq. Nutaanik aningaasanik imminngikkuni taamaalluni imaartussaavoq.

Demokraatit: Aningaasat isertitat amerlisariaqarput

Namminersulivinnissap oqallisigineqarnissaa suli siusippallaartoq Demokraatit isumaqarput.

- Tapiissutit ataatsimoortut pingaarnertut isumalluutigiunnaarutsigit namminiilivinnissaq qanoq iliorluta anguniarsinnaaneripput oqallisigilerumaarparput, Demokraatini aningaasaqarnermut oqaaseqartartoq Tillie Martinussen oqarpoq.

Aamma atuaruk Meeqqat Illersuisuata ukiortaamut oqalugiaat nuannaarutigaa

Naalakkersuisooqataasut pingajuanni Atassummi siulittaasup tulliata, Steen Lyngep, Naalakkersuisut siulittaasuata ukiortaami oqalugiaataa naammagisimaarpaa. Namminersulivinnissamut oqallinneq ukiaanerani ataatsimiinnissamut utaqqisinneqassasoq taanna isumaqarpoq.

- Paasissutissat suleriaqqinnissamut pisariaqartinneqartut ukiamut saqqummiuneqartussaapput, tassanilu tunngaviusumik inatsisissat suliarineqarnissaannut qanoq sinaakkuteqassanersut paasissutissat suliarineqarumaarlutik, Atassummeersoq Steen Lynge oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat