Illuatungiliuttut Naalakkersuisut siulittaasuata oqalugiaataa amigaateqarsoraat

Ilaatigut namminersornerulivinnissap taakkartorneqarnerunissaa politikerit illuatungiliuttut kissaatigigaluarpaat.

- Suleqatigiinnikkusussusermik oqariartuuteqarnera Partii Naleqqamit peqataaffigissavarput. Neriuppungalu paaseqatigiinnerulluta, aammalu anguniagaqatigiilluta ingerlariaqqissasugut.

- Tassami namminersorneq, massakkut eqqussimasarput suli annertusarniarparput, tassalu namminersulivinnissaq. Taamaammat partiit ikioqatigiinnerulluta inuiaat ataatsimut isigalugit sulineq ingerlattariaqalerparput, Hans Enoksen KNR-imut oqarpoq.

Tamannalu Aqqaluaq B. Egedemit tapersersorneqarpoq.

Aamma atuaruk Kim Kielsen: Meerartatta atornerlunneqannginnissaat pitsaanerusumik illersortariaqarpagut

Namminersornerulivinnissamullu piareersaasumik aningaasarsiornissamut periarfissat amerlanerit sulissutigineqassasut Egede isumaqarpoq.

- Namminersulereeratta, namminiilivinnissatta tungaanut suliassat tamaavitta ataasiakkaatut tigusariaqarparput, aamma naalakkersuinikkut. Taamaammat uani pingaaruteqartorujussuuvoq, nunap immini inuussutissarsiornera sallertut nukittorsassallugu.

- Taannalu oqalugiaammi sammineqanngilaq, Aqqaluaq B. Egede taama oqarpoq, ilanngullugulu oqarluni, Nunatta aningaasanik isertitsinissaanut aatsitassarsiorneq Kim Kielsenip isumalluutigivallaaraa.

- Imminut pilersorneq naatitatigut, aalisakkanik aamma assigiinngikkuutaarnerusunik inuussutissarsiuteqarnikkut Nunatta iluani imminnut isumalluusersornissarput Nunatta avataanit inuussutissanik tikerartitsinerput illua tungilerlugu.

- Taanna taarsiullugu aatsitassarsiornermut sallertut toqqammavissatut erligisariaqarparput. Inuussutissarsiutit allat takkutilaariarlutik tammaqqittussat tulliukkumaarput, Aqqaluaq B. Egede KNR-imut oqarpoq.

Taamaattoq meeqqat sumiginnagaasut sullinneqarnerulernissaat Aqqaluaq B. Egedep nersualaarpaa.

Aamma atuaruk Meeqqat Illersuisuata ukiortaamut oqalugiaat nuannaarutigaa

Tamannalu Hans Enoksenimit aamma isumaqatigineqarpoq.

- Meeqqanik isumaginninnerup pitsaasumik qulakkeerneqarnissaa, taanna aamma nuannerpoq, Partii Naleqqap siulittaasua Hans Enoksen taama oqarpoq.

Aalisartut periarfissaat annertusaaffigineqarnissaannik Kim Kielsenip oqariartuuteqarnera isumaqataaffigalugu Hans Enoksen aamma oqarpoq.