Meeqqat Illersuisuata ukiortaamut oqalugiaat nuannaarutigaa
Meeqqat toqqissisimanerusumik peroriartornissaannut innuttaasut sulissuteqarnerunissaannik Naalakkersuisut siulittaasuat, Kim Kielsen ukiortaamut oqalugiaammini ilaatigut kajumissaarivoq.
Tamannalu Meeqqat Illersuisuata, Aviâja Egede Lyngep nuannaarutigaa.
Aamma atuaruk Simon Lynge meeqqat pisinnaatitaaffii pillugit qaammarsaaqataassaaq
- Siullermik Meeqqat Illersuisuattut nuannaarutigilluinnaqqissaarpara, Naalakkersuisut siulittaasuata ukioq 2016, meeqqat ukiorisussaanerannut nalunaaruteqarnera. Meeqqat Illersuisuattut misigivunga, meeqqat nipaat uani tusaaneqarsimasoq, aammalu ukiaanerani annertoorujussuarmik oqariartuutigisimasavut tusaaneqarsimasut, Aviâja Egede Lynge oqarpoq, Kim Kielsenillu oqaatigisami piviusunngortinnissaanut aamma iliuuseqaqqullugu.
- Takutitsinissamut piffissanngorpoq. Piviusunngortitsinissamut maanna suliaqarnissaq tullinnguuttariaqarpoq, Meeqqat Illersuisuat oqarpoq.
Aamma atuaruk Meeqqat illersuisuat: Nalunaaruteqartarneq toqqissisimanarnerulersinneqarli
Meeqqat sumiginnagaasimasut sullinneqarnerat nuna tamakkerlugu sukaterneqarsinnaasoq, Meeqqat Illersuisuata aamma oqaatigaa. Taamaammallu Naalakkersuisut kommuninut piumasaqarnerusariaqartut, Aviâja Egede Lynge isumaqarpoq.
- Meeqqat pitsaanngitsumik inuuneqartut nalunaarutigineqarnissaat utaqqiinnartarnagit, kisianni aamma orniguttarneq misissuinerlu atorlugit, suleriaatsillu allat atorlugit nunaqarfiilu tikillugit maanna iliuuseqartoqassasoq pissusissamisoorsoraara, Aviâja Egede Lynge oqarpoq.
