Kim Kielsen: Meerartatta atornerlunneqannginnissaat pitsaanerusumik illersortariaqarpagut
Kim Kielsenip ukiortaami oqalugiaammini sammisat arlalissuit tikippai. Meeqqanulli 2015-imi atugassarititaasut oqallisigineqarnerujussuat tamatsinnut pitsanngorsaavigeqqullugu.
Naalakkersuisut siulttaasuat ilaatigut ima oqarpoq:
- Aatsitassat ikummatissarlu nunatsinni pisuussutini pingaarnerpaajunngillat. Inuit pingaarnerpaajupput! Nunatsinnimi meerartavut, illit aamma uanga peqatigiilluta pisuussutini pingaarnersaavugut.
Naalakkersuisut siulittaasuata, kikkut tamarmik pitsaanerulaartumik iliuuseqarnissaat kaammattuutigaa.
- Pitsaanerulaartumik immitsinnut paaraluta. Tamatta pitsaanerulaartumik sutigut tamatigut iliortarutta, immitsinnullu paarilluarnerulaarluta, taava inuttut, nunatta inuiattullu namminersulivinnissatsinnut aqqut oqinnerulissaaq. Ataatsimoorluta tamatta ikioqatigiinnikkut tapersersoqatigiinnikkullu suliniutinik pimoorussilluta, namminersorneq siunnerfigalugu suliaq ingerlatiinnassuarput. Uagummiuna nammineq tamattaallutalu nukissaqarnitsigut namminersulivissinnaasugut - Nunarput meeqqattalu siunissaat pillugit, Kim Kielsen oqarpoq.
Kim Kielsen oqalugiaammi aallaqqaataani suliffissaaleqinerup 2015-mi annikilliartornera nuannaarutigalugu taavaa. Timmisartoqarfiliortiternissallu pingaaruteqassusaa taallugu.
- Angallannikkut attaveqaatit suli ilungersunarput. Siunissami billetsit akiinik pitsaanerusunik nunallu immikkoortuini amerlanerusuni toqqaannarnerusumik angalasoqarsinnaalernissaanik pilersitsisussamik mittarfiit aaqqissugaanerat nutaaq Inatsisartuni amerlanerussuteqartumik tapersersorneqartumik akuerineqarpoq. Aaqqissugaaneq taamaattoq siunissami takornariaqarnermut inuussutissarsiornermullu pitsaanerusumik atugassaqartitsilissaaq annertunerusumillu ineriartortitsissalluni, Kim Kielsen oqarpoq.
Siulittaasup Artic Winter Games 2016-mi, Nuummi ingerlanneqarnissaa qilanaaraa.
- Suliassarujussuaq ataatsimoorluta kivissuarput. Taamaattumik kikkut tamarmik ikiuunnissaat kaammattuutigaara, Kim Kielsen oqarpoq.
Ukiortaami oqalugiaammini naggasiinermini Kalaallit Nunaanni namminiilivinnissap akisussaaqataaffiginissaa kikkunnut tamanut kaammattuutigaa.
- Aningaasarsiornikkut namminiilivinnissaq tamatta akisussaaffigaarput. Tamanna suleqatigiinnikkut akisussaaqatigiinnikkullu pisinnaasoq, Kim Kielsen oqarpoq.
