Qulaarpaa Namminersulernissamut sipaarniarujussuartoqassaaq

Pisortat missingersuutaat ikilileriffigalugit, suliassaqarfiit angerlaassorneri unitsillugit, aningaasallu ileqqaakkat aningaaserivimmut toqqorlugit. Tassa namminersornissamut ilitsersuut, aningaasanik aqutsinermut professori taama oqarpoq.

Naak politikerit namminersulernissamut ingerlaarneq unitsitassaanngitsumik nuannaarlutik aallartikkaluaraat, illerngit namminersulernissamut ingerlaffissat suli ersernerlupput.Pisortat aningaasartuutaat amerliartorput aqutsisoqarfiillu alliartorlutik. Namminersornissaq eqqarsaatigalugu tamanna kukkusumik ingerlanerusoq, aningaasanik aqutsinermut professori Lars Lund isumaqarpoq.

AAMMA ATUARUK Gem til de regnefulde dage

Taanna siunnersuuteqarpoq politikerit aningaasanik atuinikinnerulissasut, naalagaaffiullu tapiissutaasa ilaat aningaaserivimmut toqqortarlugit erniaat ungasinnerusoq isigalugu annertuumik iluaqutaaniassammata. Pingaarnersiuisariaqarporli.

- Aatsaalli pisortat aningaasartuutaat ikilileriffiginiarlugit aalajangernikkut taamaaliortoqarsinnaavoq.

Lund kalaaleq atorfiliusimasoq Jakob Januusen peqatigalugu ukioq manna siusinnerusukkut pisortat aningaasartuutaat pillugit nalunaarusiorsimavoq. Suliaminni inerniliuppaat unammilligassat annertuut siunitsinniittut.

Kalaallit Nunaanni pisortat aningaasartuutaat annertoqaat, Danmarkimisut appartariaqarput.

- Pisortat aningaasartuutaat 30 procentimik appartariaqarput.

AAMMA ATUARUK Avammut tunisat nalingi 377 millionit koruuninik amerleriaateqartut

Imaappoq naalagaaffiup tapiissutai isumalluutigiunnaassagaanni assersuutigalugu ilinniartitaanermut isumaginninnermullu aningaasartuutit pingajorarterutaannik ilanngartariaqarput.

- Piuminarsaanikkut pisariillisaanikkullu pisortat aningaasartuutaat assut annikillisarneqarsinnaapput.

Killiffik unaavoq aningaasat isertittakkavut pingasunngorlugit aggoraanni aggornerit marluk Danmarkimeeersuupput, ataatsillu aalisakkanit avammut tunisartakkatsinneerlutik.

Namminersornissamik eqqarsaat piviusunngussappat aningaasat allatut isertittariaqassapput.

Maannakkorpiaq naalagaaffiup tapiissutai aalajaatsumik isertitaapput. Naak assut sakkortussagaluartoq Lars Lund isumaqarpoq periarfissaasoq tamakku ilaat kiffaanngissuseqarnermut aningaasaateqarfimmut nakkartinneqartarnissaat, naalagaaffiup tapiissutai unippata aningaasartuutit ilaannik matussutissatut.

- Aningaasaateqarfimmiittut erniaat pigineqassapput, aalisakkanillu avammut tunisanit takornariartitsinermillu isertitat isumalluutigineqarlutik.

Lars Lund ullumikkut CBS-imi professoriuvoq soraarneq, Ilisimatusarfimmilu ukiut arfinillit immikkoortortami pisortaasimalluni.