Aningaasanut aappaagu inatsisissaq isumaqatigiissutigaat
Danmarkimi naalakkersuisut Dansk Folkepartiillu 2007-imut aningaasanut inatsisissaq ippassaq isumaqatigiissutigalugu naammassivaat.
- Aningaasanut inatsisissami innuttaasut atugarissaarnissaat pineqarpoq, taannalu junimili suliarineqalerpoq, inaarneqarsimallunilu. Aningaasanut inatsit Venstret eqqaassanngikkaani partiinit tamanit tapersersorneqarpoq, inatsisip nutaap saqqummiunneqarnerani iluarisimaarinnilluni taama oqarpoq danskit aningaasaqarnermut ministeriat Thor Pedersen.
- Piffissaq sivisooq atorlugu suliaraarput. nunarsuarmioqatigiit atugarissaarnissarlu pillugu imaqartoq junimi suliarigatsigu, Folketingimi ilaasortanit 179-iusunit 158-t tunuliaqutaraavut, Thor Pedersen unnersiorpoq.
- Aningaasanut inatsit pitsaasuuvoq, pitsanngoriaaterpassuit pissapput. Ilaqutariit meerallit meeqqerivinnut akiliinikinnerulissapput. Utoqqarnut aningaasaliissutissat amerlineqassapput, pingaartumik utoqqarnut pissakinnerusunut. Peqqinnissamut kræftimillu napparsimasut suliarineqartarnerinut aningaasaliissutit aamma amerlissapput, taamatuttaaq avatangiisinut tunngassuteqartunut tapiissutit pitsanngoriassallutik, aningaasaqarnermut ministeri oqarpoq.
