Angut 51-inik ukiulik nakuuserluni atoqateqarsimanini pissutigalugu killiligaanngitsumik katsorsarneqartussanngortoq
Angut 51-inik ukiulik arnamut 2018-imi nakuusersimanini arnamillu allamik Nuummi angerlarsimaffimmini siorna pinngitsaaliilluni atoqateqarsimanini pissutigalugit Danmarkimi tarnikkut nappaatilinnut napparsimmavimmi killiligaanngitsumik katsorsarneqartussanngorpoq.
Nunatta Eqqartuususisuuneqarfiata eqqartuussut pingasunngornermi aalajangiiffigigaa, politiit tusagassiuutinut nalunaarutigaat.
Angut arnamik 50-inik ukiulimmik saviminermik amitsukujuumik annersitseriarluni, pinngitsaaliilluni atoqartigisimanerarlugu unnerluutigineqarpoq, eqqartuussiviulli pinngitsaaliilluni atoqatiginninnermi pinngitsuutippaa.
Angut tamatuma saniatigut arnamut allamut 2018-imi juulimi nakuusersimasutut unnerluutigineqarpoq, tamatumanillu eqqartuussivimmi aamma eqqartuunneqarpoq.
Unnerluussisussaatitaasulli unnerluutigineqartup nakuuserluni atoqateqarsimaneranut paasissutissat suliami naammattutut nalilerpaat. Nunattalu Eqqartuussisuuneqarfiata tamanna isumaqatigalugu pingasunngornermi aalajangiiffigaa.
AAMMA ATUARUK Angut ernutassaminik pinngitsaaliilluni atoqateqarsimasoq paarisassanngortitaasoq
- Nunatta Eqqartuussisuuneqarfiata suliamik naliliinitsinnik isumaqatiginninnera Nunattalu Eqqartuussisuuneqarfiata angutip Danmarkimi tarnikkut nappaatilinnut napparsimavimmi killiligaanngitsumi katsornarneqarnissaanut piumasaqarnitsinnik malinninnera ilorrisimaarutigeqaara, unnerluussisussaatitaasoq, Emil Maegaard-Hoffmann oqarpoq.
Angut tarnimigut napparsimasoq pisuni marlunni pinngitsuunerarpoq. Angutip tarnimigut napparsimanerata annertussusaa pissutigalugu Danmarkimi katsorsarneqassasoq, politiit paasissutissiipput.
Aammattaaq tarnikkut nappaatinut ilinniarfimasut, Pinerluttunik Isumaginnittoqarfiup eqqartuussiviullu katsorsarneqartup aniguisinnissaa aarlerinarunnaartutut aatsaat nalilerunikku katsorsarneqarnissamik pineqaatissinneqarnera unitsinneqarumaartoq Nunatta Eqqartuussisuuneqarfiata aalajangerpaa.
