Angut ernutassaminik pinngitsaaliilluni atoqateqarsimasoq paarisassanngortitaasoq

Angut 50-ikkut qeqanni ukiulik ernutassani ukiukitsoq ukiup aappaata affaanik sivisussusilimmi arlaleriarlugu pinngitsaalillugu atoqateqartarsimasutut killiligaanngitsumik sivisssusilimmik paarisassanngorlugu Nunatta Eqqartuussisuuneqarfiani sisamanngornermi eqqartuunneqarpoq.

Pinerlunneq piffisssami 2016-imi ukiamiit 2018-ip aallartinneranut pisimavoq.

Angut ernutassani niviarsiaraq qulit aqqanillillu akornanni ukioqarnerani 15-eriarnermit ikinnerunngitsunik pinngitsaalillugu atoqatiginnissimasutut Qaasuitsup Eqqartuussisoqarfiani eqqartuussaavoq. Taava aamma ernutassaminik pingitsaaliilluni atoqateqariarsimasutut, kannguttaalliorfiginnittutut taavalu atoqatigiinnerunngitsumik kinguaassiutaatigulli allatut iliuuseqarsimasutut eqqartuussaavoq. 

Pisimasuunerakkat arlalissuit Nunatta Eqqartuussisuuneqarfiani ilumoornerarpai. Eqqartuussivimmi suliaq taamaammat qanoq pineqaatissinneqarnissaannut tunngavoq.

Eqqartuussut iluarisimaaraa

Angut pifissami killiligaanngitsumi paarisassanngotillugu eqqartuussivimmi eqqartuunneqarpoq, Unnerluussisussaatitaasullumi taama eqqartuussinissamik tunngavilersuinikuupput. 

Angutilli eqqartuussut Nunatta Eqqartuussisuuneqarfianut suliareqqitassanngortippaa - Eqqartuussisuuneqarfiullu eqqartuussiviup siorna septembarimi eqqatuussutaa atuuttussanngortippaa. 

- Eqqartuussinermi inernerusoq, eqqartuussaasup pinerlunneranut ilungersunaqisumut tunngasoq, iluarisimaarpara,  unnerluussisussaatitaasuni fuldmægtigi Line Thornberg oqarpoq. 

Nunatta Eqqartuussisuuneqarfiata piffisamik killiligaanngitsumik paarineqartussanngortitsinermini pinerlunnerup peqqarnnissusiaa angutillu pinerluttulioreersimasuunera tunngavilersuutitut pingaartuutippaa.

Eqqartuussisuuneqarfiup aamma eqqartuussap pinerloqqinnissaa pinaveersimatinniarlugu paarisassanngortinnissaa pisariaqartuunerarpaa..  

Kisianni Nunatta Eqqartuussisuuneqarfiata nviarsiaqqap taartisiassai 200.000 koruuniniit 125.000 kroninut ikilisippai.