Angerlarsimaffeqanngitsunut kialaarfik matoqqasoq
Kialaarfik Kommune Kujalliup naalakkersuisullu akornanni suleqatigiinnikkut pilersinneqartoq KNR-imi siorna decembarip ulluisa arfernanni allaaseraarput. Naalakkersuisut Qaqortumi kialaarfimmik ammaasoqarnissaa pillugu 750.000 koruuninik aningaasaliipput.
Kommune Kujallermi borgmesteri Stine Egede(IA) tusagassiorfinnut nalunaarummi taamanikkut ima oqarpoq:
- Kommunitta angerlarsimaffeqanngitsunik ajornartorsiuteqarneq assut ilungersuuppaa.
Kommunilli kialaarfik taanna qaammatialunnguit qaangiutiinnartut maanna matoqqatikkallarpaa, aqutsisussamik nutaamik ujartuisoqarnerata nalaani matoqqqatikkallarneqarluni.
Ammanerminngaanniit matoqqasarnerusoq
Kialaarfilli ammatinneqartarnerata nalaani aatsaat matoqqalinngilaq.
Kevin Perry-p, isumaginninnermk sulianut immikkoortortami lektorip, kialaarfimmi atukkat kommunillu aqutsinera inoqatinut attaveqaqatigiittarfikkut Linkedin-ikkut isornartorsiorpai.
- Isumaginninnermut neqeroorutit pilersaarusiorluarneqartussaapput, iliuusissatut pilersaarutit ersarissut, pikkorissumik ingerlatsineq, sulisullu ilinniarsimallutillu aalajaatsut pisariaqartinneqarlutik, taanna allappoq, nangillunilu:
- Taamaaliortoqanngippat siunertat pitsaasut qatangiinnartinneqassapput, isumaginninnikkullu neqeroorutit pissusissamisut ingerlajunnaassallutik, Kevin Perry oqarpoq.
Kevin Perryp Qaqortumi ilisimatuussutsikkut suliniummut atatillugu kialaarfik nammineq pulaarpaa, Qaqortumi isumaginninnermi atukkat neqeroorutillu tassani ilaatigut misissuiffigineqarlutik.
Kialaarfik ammarneqarmalli arlaleriarluni matoqqasarsimasoq, ammasarfiilu nalornissutigineqarsimasut, taassuma misisuinermini paasivaa. Kialaarfik ammarneqarmalli ullut 57-it ingerlaneranni katillugit ulluni 25-ni matoqqasimavoq.
KNR-ip kialaarfiup aqutsisorisimasaa Kirstine Johanne Høegh saaffiginniffigisimavaa. Taanna oqaaseqarsinnaannginnerarpoq, Kevin Perrylli LinkedInikkut allagaanut innersuussilluni.
Suliffimmi atukkat toqqissisimananngitsut
Kialaarfik pisortamik amigaateqaannanngilaq. Sulisussarsisinnaasimanngitsormi Kommune Kujalliup KNR-imut aamma uppernarsarpaa.
Suliffimmi atukkat toqqissisimananngitsut sulisussarsiorniarnermi ajornartorsiutinut, Kevin Perryp isornartorsiugaanut, attuumassuteqarneersut kommunip toqqaannartumik akissuteqarfiginngilaa. Sulisut atukkat assigiinngitsut toqqissisimananngitsut Kevin Perryp ilaatigut tikkuartorpai, kialaarfiup ajornartorsiutaanut ilungersunartunut taakku ersersitsisisut taassuma allaaserisamini oqaatiigaa, nangillunilu:
- Sulisoq oqarasuaatitigut oqaloqatigineqarnikkkut atorfinitsinneqarpoq, atsiornikkullu isumaqatigiissusiorfigineqarnani suliassanilluunniit ilitsersuunneqarnani, sulisusullu allap nappaasuarmut kræftimut katsorsarneqarminut atatillugu kemoterapeernera eqqarsaatigineqarnani, taanna allappoq, nangillunilu:
- Sulisut sulinermi nalaani kisimiikkajupput, ilaatigut ulorianartorsiortinneqartarlutik, atuisut ilaat saassussiumasuullutik, politiiniillu peerneqartariaqarsimallutik.
Pisuni ilungersunartut ilaat Kevin Perryp assersuutigaa, tassa atuisut ilaat hashpsykoseqartoq sulisup kisimiilluni sullittariaqarsimagaa assersuutigigamiuk. Sulisup oqarnera naapertorlugu inuk pineqartoq nakuuserniarsinnaasutut illoqarfimmi ilisimaneqarpoq.
Kommune Kujalliup isumaginninnermi sullissinini aatsaat allannguiffigerujussuarpagu Kialaaq aatsaat iluatsissinnaasoq Kevin Perryp oqaatigaa. Pipallataasumik sulisoqarnani pilersaarusiorluartarnissaq aallunneqartariaqartoq taanna oqarpoq, suliat naammassisat amerlanatik pitsaasuunissaat pingaartinneqartariaqartoq oqaatigalugu.
Kialaarfik piffissaligaanngitsumik matoqqatinneqartoq
Kialaaq Qaqortumi qaqugu amassanersoq suli ilisimaneqanngilaq. Qaqugu ammaqqissanersoq kommunip ilisimatitsisssutigisimanngilaa, ajortorsiutilli assigiinngitsut aaqqiivigisariaqarpaat - tassa aqutsinikkut ingerlatsinikkullu aaqqitassaqarluni.
Qaqortumi angerlarsimaffeqanngitsut ikiorneqarsinnaanngikkallarput, naak sullinneqarnissamut neriorsorneqarnikuugaluartut.
Nunatsinnni angerlarsimaffeqanngitsut 2022-mi nalunaarsorneqarmata Kommune Kujallermi angerlarsimaffeqanngitsut 106-iuppput, taakkunannga affaasa missaat Qaqortumillutik.
KNR-ip Kommune Kujallermi isumaginninnermut pisortaq, Nielsine Petersen attaviginiarsarigaluarpaa, taannali sulinngiffeqarpoq.
Tamatuma saniatigut ajornartorsiutit isornartorsiorneqartut assigiinngitsut sinneri KNR-imit Kommune Kujallermut saqqummiunneqarput, kommunillu taakku suli pingasunngornermi ullup ingerlanerani akissuteqarfiginiarlugit neriorsuutigaa.
