Qaqortumi angerlarsimaffeqanngitsut kialaarfissaqalissasut

Qaqortumi angerlarsimaffeqanngitsut kialaarfimmi nutaami uffarneq, qasuersaarneq, kissasserneq isumassorneqarnerlu periarfissaassapput, pisortanillu aaqqissuussamut aallaaviussalluni.

Allattoq Connie Fontain

decembarip 06-at 2024 12:46

Qaqortumi angerlarsimaffeqanngitsut kialaarfimmi nutaami oqquinissamut kissassernisamullu periarfissaqassapput.

Kialaarfik Kommune Kujalliup naalakkersuisullu akornanni suleqatigiinnikkut pilersinneqassaaq, tamannalu angerlarsimaffeqanngitsut pillugit suliniutinut pitsanngorsaataassalluni.

Angerlarsimaffeqanngitsut ikilisarneqarnissaannut suliniutit arlaqarput, kialaarfillu pisortat aaqqissuussaata aamma innuttaasut atugarliortut akornanni aallaaviussasoq eqqarsaataavoq. Suliamik isumaginnittut taamaalillutik innuttaasunik atugarliortunik kialaarfimmi naapitsisinnaasassallutik.

Aamma atuarukIlisimatusartoq: Angerlarsimaffeqanngitsut nutaamik suliniuteqarnikkut sullilluarneqarnerulissapput

Kommune Kujalleq tusagassiuutinut nalunaarummi allappoq, borgmesterillu Stine Egedep (IA) qanoq nuannaartiginini isertuutinngilaa.

- Kommunitta angerlarsimaffeqanngitsunik ajornartorsiuteqarneq assut ilungersuuppaa. Kialaarfiup nutaap innuttaasut naligalugit naapinnissaannut minnerunngitsumillu sapinngisaq malillugu pitsaanerpaamik ikiornissaannut periarfissippaatigut.

Sådan hjælper varmestuen de hjemløse

Tunngaviusumik pisariaqartitat naammassissallugit, soorlu nerisassat, uffarneq, qasuersaarneq, isumassorneqarneq, sulisunik atuisunillu allanik allamik saaffissaqanngitsunik oqaloqateqarneq.
Ulluinnarni piginnaasassat pillugit siunnersuineq ilitsersuinerlu
Pisortat aaqqissuussaannut attaviliisoq: Kommunip sullissisuinut innuttaasunik sumiiffii malillugit naapitsisartunut, akerlianik innuttaasut kommunip allaffianukanngikkaluarlutik (tarnip pissusaannik ilisimasallit, inunnik siunnersortit il.il.)
Atoqqitassanngorlugit iluarsaassinermik suliassat pillugit sammisaqartitsinermut neqeroorusiorneq
Kajumissutsimik sulineq sulisut piukkunnarluartunit ikorfartorneqartoq aqunneqartorlu ilanngutitillugu (atuisut isaannik isigalugu pitsaassuseq)
Angerlarsimaffeqanngitsut eqimattat mianernartut toqqissisimasumik eqqissisimaffeqarnissaat.
Sumiiffinni atornerluinermik sullissinermut suleqataaffissaq
Inooqatigiinnermik ilaalersitsisumillu sammisaqartitsinerit neqeroorutigalugit soorlu umiatsiamik angalanerit
Ujartuilluni sulineq ammasumillu siunnersuineq

Paasissutissarsiffik: Kommune Kujalleq

Allisiguk

Naalakkersuisoq nuannaartoq

Suliniut naalakkersuisunit 750.000 koruuninik aningaasaliiffigineqarpoq, tamannalu naalakkersuisup akisussaasup nuannaarutigaa.

- Naalakkersuisut Kommune Kujalliup angerlarsimaffeqanngitsut pillugit sulineranut tapiissuteqarnermut assut nuannaarput. Aalajangiisuulluinnarpoq, innuttaasut atugarliortut pillugit kommunit tamakkiisumik sammivilimmik sulinissaat, isumaginninnermut ilaqutariinnullu naalakkersuisoq, Jess Svane oqarpoq.

- Kialaarfik tassaavoq atugarliortunut neqeroorut pitsaasoq, atugarliortut takkutiinnarsinnaallutik eqqissisimaarniarlutik kialaariartorlutik, peqatigalugu kommunip sullissisui ikiuinissamut piareeqqasut, Jess Svane oqarpoq.

Stine Egedelu aamma nuannaarpoq:

- Kommunip Naalakkersuisut tapiissuteqarnerat assut nuannaarutigaa, aamma suliniutitta nukittorsarnissaannut piareersimavugut, taanna naggasiivoq.

Politikerit suliniummut 2025-mi suli tapiissuteqaqqinniartut kommune tusagassiuutinut nalunaarummi allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.