Assi: Kommuneqarfik Sermersooq

Kommuneqarfik Sermersooq: Angerlarsimaffeqanngitsunut containerit pillugit nalilersuisoqassaaq

Nuummi angerlarsimaffeqanngitsunut containerit inissiaagallartut nalilersorneqassapput angalarsimaffeqanngitsullu pillugit suleriaaseq allanngortinneqassalluni. Kommuneqarfik Sermersuumi Suliffeqarnermut Isumaginninnermullu ataatsimiititaliami siulittaasoq taama isumaqarpoq.

Nuummi angerlarsimaffeqanngitsut suliffillik containerini Kommuneqarfik Sermersuup pigisaani utaqqiisaasumik ineqartinneqarnissaannik neqeroorfigineqarsinnaapput.

Naak containerini ineeqqanik attartorsinnaaneq ukiuni marlunni periarfissaareeraluartoq ineeqqat affaannaat atorneqarput.

Ineeqqanik attartorsinnaanermut neqerooruteqarsinnaaneq kommunimit nalilersorneqartariaqartoq, Ilisimatusarfimmi inuiaqatigiilerisoq ilisimatoorlu Steven Arnfjord isumaqarpoq.

Nalilersuisoqassaaq, Suliffeqarnermut Isumaginninnermullu ataatsimiititaliami siulittaasoq, Charlotte Ludvigsen oqarpoq.

AAMMA ATUARUK Angerlarsimaffeqanngitsut sullinneqarnerat nalilersorneqartariaqarpoq

Containerini ineeqqat affaat atorneqannginnerat naammaginanngitsoq, taamaattumillu neqeroorutigineqartartunut piumasaqaatit pillugit politikerit suleqatigalugit naliliisoqassasoq, Kommuneqarfik Sermersuumi Suliffeqarnermut Isumaginninnermullu ingerlatsivimmi pisortaq, Isak Nielsen Kleist KNR-imut mailikkut allalluni oqarpoq.

Angerlarsimaffeqanngitsut containerini ineeqqanik attartorsinnaanissaannut suliffeqarnissaat piumasaqataavoq.

Charlotte Ludvigsenip ilanngullugu oqaatigaa, angerlarsimaffeqanngitsut containerini ineeqqanik attartorsinnaanerannik neqeroorfigineqartarnerat ataatsimiititaliap februaarip ulluisa tallimaanni ataatsimiinnissaannut saqqummiunniarlugu.

AAMMA ATUARUK Nuummi angerlarsimaffeqanngitsunut containerini inissat affaat atorneqanngitsut

Ataatsimiititaliami siulittaasup kissaatigaa, angerlarsimaffeqanngitsut ikiorneqarnissaannik ineriartortitsisoqassasoq.

Ataatsimiititaliap siulittaasuata oqarnera naapertorlugu angerlarsimaffeqanngitsut 75-it missaannik amerlatigisut Nuummi angerlarsimaffeqanngitsut unnuisarfiini atuisartuusut, 350-illu missaanniittut ilaquttaminni, ikinngutiminni ilisarisimasaminnilu najugaqartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat