Nuummi angerlarsimaffeqanngitsunut containerini inissat affaat atorneqanngitsut

Kommuneqarfik Sermersooq ukiut marluk matuma siorna containerinik 25-nik ineerartalinnik pisivoq,  Nuummi inissaaleqisorpassuit  ilai inissaqartinniarlugit.

Containerinili inissat affaat inorlugit atorneqarput.  

Containerini inissat 25-usut taakkunannga 14-it decembarip qeqqata missaanik atorneqanngillat,
ineeqqanik attartortut akiliineq ajormata anisinneqartariaqarsimammata, Kommuneqarfik Sermersuumi siunnersorti Lars Jørgen Kleist taama oqaluttuarpoq.

Containerini ineeqqamik attartortunut piumasaqataavoq, angerlarsimaffeqanngitsut suliffeqarnissaat, ineeqqanik attartorneq qaammammut 800 koruunit missaannik akeqarpoq.

AAMMA ATUARUK Sermersooq Containerinik angerlarsimaffeqanngitsut inissaannik pisisoq

Lars Jørgen Kleistip ilanngullugu oqaluttuara ukiup ingerlanerani containerini najugaqalertartut anisartullu ingerlaavarsimasut.

Kommuneqarfik Sermersumi isumaginninnermut suliffeqarnermullu immikkoortortaqarfiup containerit  nakkutigisarivai, imikkoortortaqarfimmiillu angerlarsimaffeqanngitsut containerini ineeqqanik attartorniarlutik allatsissimasut attaviginiarnerat ajornartorsiutigaat, Kommuneqarfik Sermersuumi siunnersorti taama oqaluttuarpoq.

Angerlarsimaffeqanngitsut oqarasuaatinik angallattakkanik peqanngikkunik sumiinnerminnik nalunaarsimanngillat, Lars Jørgen Kleist KNR-imut taama allappoq.

Containerit qeqertami Nuuk Imeq tunuaniipput. Containerit inissisimaffiata attartorneqarnera apriilip ulluisa 15-ata tungaanut killeqarpoq. Apriilip ulluisa 15-ata kingorna inissisimaffissaanik  Kommuneqarfik Sermersooq maanna misissuivoq