Anda: Soraarsitsisoqannginnissaq qulakkeersinnaanngilara
Akitsuutit qaffanneqarnissaannik Naalakkersuisut siunnersuutaat isornartorsiorneqangaatsiarnerisa kingorna tunuartinneqarput. Tamanna aningaasanut inatsimmi amigartooruteqarnermik kinguneqartussanngormat pisortaqarfinni, ingerlatsivinni aamma pisortanut tapiissutigineqartartut sipaarfigineqarnerisigut Naalakkersuisunit matussuserniarneqarput.
Sumi sipaarniartoqassanersoq nunatta karsianik akisusssaasup oqaatisiginnaannginerarpaa.
Ukiumut 50 millionit koruuninik sipaaruteqartoqarnissaq upernaarmanna aallartinneqarpoq.
Maanna sipaarutissanik allanik ilaneqartussanngorput taakkua aappaagumut atuutilersussatut pilersaarutigineqarluni.
Sipaarutissat atuutiinnarneqartussapput ukiullu tulliuttut marluk amerlineqartussaapput.
Tamatuma kingunerisussanngorpaa qinersivik 2019-imi naappat, Namminersorlutik Oqartussat aningaasartuutaat siornamut sanilliullugit 300 millionit koruuninik ikinnerussallutik.
Aamma atuaruk Naalakkersuisut sumi sipaarniarnerlutik aaliangerpaat
Aamma atuaruk Aningaasanut inatsit 2015-imoortoq akuerineqarpoq
Sipaarutigineqartussat taama amerlatigisussaagaluartut pisortani sulisut akornanni soraarsitsisoqannginnissammik qulakkeerinnissinnaanani Andreas Udlum oqarpoq.
- Oqaatigisinnaanngilara soraarsitsisoqannginnissaq qulakkeerneqartoq, kisianni oqariartuutigineqartoq unaavoq naalakkersuisoqarfiit assigiinngitsut nammineq akisussaaffigissavaat sipaarniarneq qanoq inissinniarnerlugu pingaarnersiunertillu qanoq inissinneqassanersut takutisssallugu, Andreas Uldum taama oqarpoq.
Pisortani naalakkersuisoqarfinnilu sipaarutigineqartussat ilai nunatta karsiata amigartoorutigisassaannut 96 millionit koruuniusunut matussusiissussaapput, akitsuutinut siunnersuutit tunuartinneqarnerisa kingorna.
Akitsuutinut siunnersuutit iluarineqanngillat, siunnersuutinillu allanik politikerit siunnersuuteqarnissamut tunuarsimaaratik.
Demokraatinit siunnersuutigineqarpoq, amigartoorutigineqartut sipaaruteqarnikkut pisariillisaanikkullu matussuserneqassasut.
Taama siunnersuuteqarneq Andreas Uldumi peqataaffigerusunngilaa, innuttaasunik kiffartuussineq akornuserneqassammat.
Taamaakkaluartoq sipaaruteqatoqassaaq, tamannalu innuttaasunik kiffartuussinermut innaarliissanngitsoq Andreas Uldum oqarpoq.
- Aningaasarparparujussuunngillat 2 millionit koruunit naalakkersuisoqarfiit ingerlataasalu sipaarniassallagit, taamaattumik ernummatiginngilara sipaarniuteqarnissaq sullissinermut innarliinissaa, Aningaasaqarnermut Naalakkersuisoq Andreas Uldum taama oqarpoq.
Aamma atuaruk Naalakkersuisut akitsuusersuiniarnertik annikillisippaat
Naalakkersuisoqarfiit tamarmik immikkut 1 procentimik sipaarniarfiussapput, ilinniartitaanermullu naalakkersuisoqarfik taamaallaat procentimik affarmik sipaarniarfiussalluni.
Peqqissutsimut naalakkersuisoqarfik sipaarniarfiussanngilaq.
Aningaasanut inatsisissatut siunnersuutip inatsisartuni novembarip ulluisa 13-ianni pingajussaaneerlugu oqaluuserineqarnissaa pilersaarutaavoq.
Sipaarniarfiusussatut siunniunneqartut sullissinermut annerusumik sunniuteqarnavianngitsut, Ilinniagartuut Kattuffianni siulittaasup Louise Tøtip oqaatigaa.
