Assi: KNR

Naalakkersuisut akitsuusersuiniarnertik annikillisippaat

Qalerallit suliarineqanngitsut imeruersaatillu eqeernartortallit akitsuuserneqassapput. Illuatungaanili ikumatissamut akitsuusersuiniarneq unitsinneqarpoq.

Raajartassiisutit amerlipput, nunatsinnilu pissutsit pitsaanerulersimapput, tamannalu akileraarutitigut isertitsiffiussaaq. Nutaarsiassat pitsaasut Naalakkersuisunit nuannaarutigineqartut, nunattalu karsianut 42 million koruuninik aappaagu isertitsiffissatut naatsorsuutigineqartut.

Aningaasallu taakku Namminersorlutik Oqartussani nuannaarutaapput, innuttaasuniillu aamma nuannaarutigineqassallutik.

Isertitat taakku nutaat pillugit Naalakkersuisut marlunngormat, akitsuusersuinissamut siunnersuutaasimasumut taarsiullugu, isumaqatigiissutaagallartumik 96,5 million koruuninik isertitsiffiusussanik saqqumiipput. Taamaalillunilu maanna 54,5 million koruuniinnarnik ujarlertoqartussanngorluni.

 

Ikummatissat akikinnerusut

Uuliamut akitsuutaaniaraluaq nunatta karsianut 60 million koruuninik isertitsissutissatut naatsorsuutigineqarsimasoq sussaarneqarpoq. Nunarsuarmilu ikummatissanut akigitinneqartut appariartornerat iluatigalugu atuisut aningaasartuutikinnerulernissaartik naatsorsuutigisinnaassavaat, tassa nunarsuarmi pissutsit allanngussanngippata.

Neqinullu akitsuusersuiniarneq aamma taamaatiinnarneqarpoq. Sulili mamakujuttut, qummoroortartut sunoorsillu akitsuuserneqassapput. Akitsuusersuinernit isertitassatut naatsorsuutigineqarsimasut 96,5 million koruuniugaluuit maanna allannguutit kingorna 18,6 million koruuninngorput.

Aamma atuaruk IA-p isumaqatigiissutaagallartoq isumaqatigingajappaa

Aamma atuaruk Pisortat sullissineranni millionerpassuarnik sipaarniuteqalersut

Taakkulu saniatigut qalerallinut suliarineqanngitsunut akitsuutit nutaat nunatta karsianut 20 million koruuninik isertitsissutaasussatut naatsorsuutigineqarput.

Aningaasaqarnermullu naalakkersuisoq, Andreas Uldum, akitsuummik nutaamik aamma saqqummiivoq, tassa imeruersaatit eqeernartullit imernillu nioqqutissaq eqqussat. Siunnersuut taanna upernaaru Inatsisartut ataatsimiinneranni isummerfigineqassaaq, naatsorsuutaavorlu akuerineqassaguni nunatta karsianut 10 million koruuninik ukiumut isertitsissutaasarumaartoq.

 

Allaffeqarfimmi sipaarniarneq

Naalakkersuisuttaaq allaffissornermi sipaarniarput. Pisortat ingerlatsineranni 2016-imi 1 procentimik sipaarniuteqartoqassaaq. 2017-imilu pisortat ingerlatsineranni 2 procentinik sipaarniuteqartoqassalluni.

Peqqinnissaqarfimmut kommuninullu tapiissutit sipaarniarfigineqassanngillat, ilinniarnermullu immikkoortortaqarfik affaannarmik sipaarniarfigineqassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat