Pisortat sullissineranni millionerpassuarnik sipaarniuteqalersut
Neqinut ikummatissanullu akitsuutit qaffanneqarnissaannik siunnersuutaagaluartoq tunuartinneqarpoq. Taarsiullugu pisortat ingerlatsineranni 2016-imi 1 procentimik sipaarniuteqartoqassaaq. 2017-imilu pisortat ingerlatsineranni 2 procentinik sipaarniuteqartoqassalluni.
Andreas Uldumip tamanna saqqummiuteqqammerpaa. Illuatungiliuttut Inuit Ataqatigiit Partii Naleqqallu siunnersuut nutaaq akerlerigaat aamma paasinarsivoq.
Aningaasaqarnermut naalakkersuisup aningaasanut inatsisissatut siunnersuutip isumaqatigiinniutigineqarnissaanut atatillugu akitsuusiinissaq saqqummiuteqqaaraluarpaa, nunatta karsianut aningaasakilliortumut 96,5 millionit koruuninik isertitsissutigineqartussanngorlugit.
Nioqutissanut nalinginnaasunut, soorlu mamakujunnut, sunoorsinut, neqinut avataanit eqqussukkanut qummoroortaatinullu akitsuutit aammalu ikummatissanut tunngasut akitsuutitigut qaffaavigineqarnissaat siunnersuutaagaluarpoq. Kingornalu saqqummiunneqarpoq uuliap pisiarineqarnerani akia Naalakkersuisunit ima appartigisussatut naatsorsuutigineqartoq allannguuteqartitsineq atuisartunit malugineqassanani, uuliamut aki maannakkutut-iinnartussatut naatsorsuutigineqarluni.
Aningaasaqarnermut naalakkersuisup Andreas Uldumip akitsuusiinissamik siunnersuut septembari naalersoq tunuartippaa nutaamillu siunnersuusiornissaq aallartillugu.
