IA-p isumaqatigiissutaagallartoq isumaqatigingajappaa

Tassunga partiit naalakkersuisuutitaqartut isumaqatigiipput, partiilli illuatungiliuttut ilaanngillat.

Aningaasanut inatsisissamut isumaqatiginninniarnerni Partii Naleqqamit namminneq aalajangiussaminnik ilaatitaqanngillat.

Naalakkersuisut Inuit Ataqatigiillu isumaqatigiissinnaanngikkaluarlutik, imminnut ungasippallaanngitsut, Inuit Ataqatigiinni aningaasaqarneq pillugu oqaaseqartartoq, Naaja nathanielsen oqarpoq.

Neqinut akitsuutit taamaatiinnarneqarput

Neqit uulialu akitsuusernissaannut siunnersuut taamaatiinnarneqarpoq.

- Siunnersuutit arlallit silatusaarpalummata tapersersorpagut. Inatsisissatullu siunnersuutitut Inatsisartuni saqqummiunneqarpata akuerissallugit isumaliutigissavagut. Taamaakkaluartoq siunnersuutit ilai isumaqatiginngilagut, taamaammallu siunnersuummut ataatsimoortumut akuersisinnaanngilagut, Naaja
Nathanielsen oqarpoq.

Aamma atuaruk Pisortat sullissineranni millionerpassuarnik sipaarniuteqalersut

Siunnersuummit peerneqartut ilai Inuit Ataqatigiit nuannaarutigaat.

- Ikummatissanut neqinullu akitsuusersuiniarunnaarnerat iluaraarput. Aallaqqaammulli ersarissumik akerleralugu oqaatigaarput, Naaja nathanielsen oqarpoq.

Sinerissap qanittuani qaleralinniarnerup akitsuusersorneqarnissaanut naammaginanngitsumik tusarniaasoqarsimanera Inuit Ataqatigiinnit akueriuminaassimasoq, taamatullu partii paasiniaaqqissaartoqarnissaanik piumasaqartoq, Naaja Nathanielsen nassuiaavoq.

Akitsuut alla saqqummiunneqarpoq

Qalerallit pillugit akitsuut alla ullumi isumaqatigiissutigineqartumi saqqumiunneqarpoq. Tassami qalerallit suliarineqanngitsut maanna akitsuuserneqalissammata.

Immikkoortullu taassuma sunniutigisinnaasai ernumassutigigamikkit Inuit Ataqatigiit isumaqatigiissutaagallartumut ilaanngillat, paasiniaaqqissaarnissamillu piumasaqarlutik.

Maannamulli saqqummiussaq iluamik alloriarnerusoq, Naaja Nathanielsen isumaqarpoq.

- Ajunngippaluttorujussuuvoq, aamma oqaluusererusupparput, Naaja Nathanielsen oqarpoq.