Naalakkersuisoqarfiit tamarmik innersuuteqarputAssi: Nils Baum, Bureau for Inatsisartut

Naalakkersuisut sumi sipaarniarnerlutik aaliangerpaat

Naalakkersuisut Namminersorlutik Oqartussani ukiumut 50 millionit koruuninik qanoq, suminngaanniillu sipaarniarnerlutik aalajangerpaat. Taamaakkaluartoq soraarsitsinernik kinguneqassanngitsoq, aningaasaqarnermut naalakkersuisoq Andreas Uldum naatsorsuutigaa

Nunatta aningaasaqarniarnera akunnattooqqavoq. Taamaattorlu naalakkersuisut pisortani 50 millionit koruuninik sipaarfeqarniarlutik siusinnerusukkut nalunaarutiginukuuaat.

Naalakkersuisoqarfiit tamarmik innersuuteqareersullu qanoq, sumilu sipaarniartoqassanersoq naalakkersuisut saqqummiuppaat.

- Naalakkersuisoqarfiit assigiinngitsut ujartuinikuupput, namminneq qanoq pissusissamisoornerpaamik sipaarniutinik ujaarlissanerlutik. Taava isumaqatigiissut suliakkiissutigisarpullu naapertorlugu 50 millionit koruuninik ujaarlernissaq iluatsissimavoq, aningaasaqarnermut Naalakkersuisoq Andreas Uldum oqarpoq.

 

Ilinniartitaaneq peqqinnissarlu sipaarfigineqarniarputtaaq

Nakorsanit kiffartuunneqarneq 5,2 millioninik sipaarfigineqartoq, aatsitassarsiornermi suliniutit angisuunut tapersiissutit 1,5 millionit koruuninik sipaarfigineqartut kiisalu Piareersarfiit 1 millioninik sipaarfigineqartut, tassaapput suliassaqarfiit sipaarfigineqarnerpaajusussanut ilaasut.

Suliassaqarfinnit allanit annikinnerusunik sipaarfigineqarnissaat Andreas Uldum tusagassiuutinut nalunaarummini allakkaluartoq, ilinniartitaanermut peqqissutsimullu tunngasuni suliassaqarfiit taamaalillutik aamma sipaarfigineqarniarput.

 

Naalakkersuisoq soraarsitaasoqarnissaa ilimaginngilaa

Namminersorlutik Oqartussat ukiumut 50 millioninik 2018-ip tungaanut sipaarfigineqarniarput, 2018-illu naanerani aningaasat 200 millionit koruunit sipaarutigineqarsimassasut pilersaarutigineqarluni.

Taamaakkaluartorli Andreas Uldumip pisortani suliffeqartunik soraarsitsisoqarnissaa ilimaginngilaa.

- Soraarsitsiortuisoqarnissaanik naalakkersuisoqarfiit arlaannaannilluunniit tusagaqanngilanga. Kisianni innersuuteqqikkuusuppara Naalakkersuisut susassaqartut, susassaqarfimmini sipaarniutissatut uannut saqqummiussimasaminnik oqaaseqarnissaat, Andreas Uldum oqarpoq.

Aningaasanut inatsisissaq akuerineqarpat Namminersorlutik Oqartussani sipaarniarnerit aallartissapput.

Aningaasanut inatsisissamut siunnersuutip Inatsisartuni apriilip 22-ani aappassaaneerneqarnissaa, maajillu aqqaneq aappaanni pingajussaaneerneqarnissaa pilersaarutaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat