Aleqa Hammond qinigaanngikkaluarluni naammagisimaarinnippoq
Nunatta Qitornai IA-lu Folketingimut qinersineq sioqqullugu Folketingimi ilaasortaatitaqarput, qineqqusaartoqarmallu partiit arfineq-marluk qinigassanngortipput. Maanna allanngorput.
Aleqa Hammond Folketingimut qinersinermi ajorsarpoq, Siumut sinnerlugu qinigassanngortittoq Aki-Mathilda Høegh-Dam folketingimut qinigaammat.
- Qinersinerup inernera assorujussuaq naammagisimaarparput, isumaqarpunga inuiaqatigiit tunuliaqutserluaraatigut, aamma qineqqusaarluarsimavugut aamma politikikkut inissisimalluarnerput, isumaqarpunga innuttaasut tunuliaqutseraat, Aleqa Hammond taama oqarpoq.
AAMMA ATUARUK Debutanten og den erfarne: Hvor er det fedt!
Aleqa Hammond 1607-init qinerneqarpoq, taakkualu 2015-imi qinersinermit ikinnerujussuupput: 2015-mi 3.759-inii qinerneqarpoq, taamanikkullu Siumut sinnerlugu Folketingimut qinigassanngortippoq.
Nunatta Qitornai siullermeerlutik Folketingimut qinigassanngortitaqarput. Tamannalu eqqarsaatigalugu, Aleqa Hammond partiilu naammagisimaarinnipput.
Aleqa Hammond 2016-imi Siumumit ilaasortaajunnaarsitaavoq, Nunattalu Qitornaanut nuulluni, taamaalinerani Siumut sinnerlugu Folketingimut qinigaalluni.
Folketingimut qinersinermi Nunatta Qitornai partiini qinigaanerpaat sisamaraat, Aleqa Hammondilu qinigaanerpaat pingajoraat. Qinigaanerpaat sisamaattut qinerneqarpoq Nivi Olsen Demokraatineersoq, taanna Aleqa Hammondimit arfineq marlunnik ikinnerusunik qinerneqartoq. Nunatta Qitornai 1616-inik qinerneqarpoq.
Qinigaannginnini nassuiarsinnaanngilaa
Folketingimut qinersineq sioqqullugu, qineqqusaartoqarneranilu, Aleqa Hammondip Folketingimi sulinera naammaginagu isornartorsiorneqarpoq. Najuuttannginnera suleqatiginnikkusussuseqannginneralu ilaatigut isornartorsiorneqarluni.
AAMMA ATUARUK Illoqarfinni annerni sisamani qinersisinnaasut 30 procentii qinersipput
Tassa nassuiaasersorsinnaanngilara annertunerusumik, innuttaasut taasinerat taama isikkoqarmat, aamma tamakkiisumik akuersaartussaallugulu ataqqisussaavarput, Aleqa Hammond oqarpoq.
- Ima paasineqassava Folketingimi suliatit naammagineqanngimmata qinigaanngitsutit?
- Innuttaasut taasinerat ataqqissavarput, aamma tunngavilersuusersorlutik qinersinngillat!
Aleqa Hammond Folketingimut ilaasortaajunnarpoq, Inatsisartunilu ilaasortaanini maanna aallunniarpaa.
