Akitsuutinut nutaanut akerliusut: Pissakinnerusut ilungersortut eqqugaaqqipput
Politikkerit neriorsuutitik attatinngilaat. Innuttaasut isumaat tusaaneqanngillat, tamannalu iliuuseqarfigineqartariaqalersoq.
Akerliussutsimik takutitsiniartut pissaanilinnut taama ilatigut oqaasissaqarput.
- Aaliangersaasunut issiavimmut ingiinnarluni sunaluunniit aaliangersassallugu ajornanngittuaraasinnaavoq, akerliussutsimik takutitsinissamik aaqqussuusseqataasoq, Mariane Alaufesen taama oqarpoq.
Innuttaasut isumaat tusarniaqqaarnagit politikkerit taamatut aalajangersaasarnerat nunatta ilaani arlalinni naammaggittaassutigaat.
Akerliusoq: Ajornerusumik inissisimalissaagut
Marianne Alaufesenilu taamaammat facebookkikkut gruppi politikkikkut oqalliffimmi innuttaasut isumaat tusarusullugit allagaqarpoq.
Nunatsinni peqqinnerusumik inuuneqalernissaq tunngavilersuutigalugu naalakkersuisut akitsuusiinerat tunngaviatigut ajoriffissaqartinngikkaluarlugu, innuttaasut killormut ajornerusumik atugaqalersinnaanerat taassuma ernummatigaa.
AAMMA ATUARUK Aningaasanut inatsit: Sikaritsit, imigassaq, sukkut, sukkulaatit mamakujuttullu akitsorput
- Innuttaasut namminneq inuuneqarput namminnerlu ullutik qanorlu atuiniarnertik aaliangertussaasariaqarpaat.
Peqqinnarnerusumimmi inuuneqarnissaq inuup nammineq tamanna akisussaaffissaraa:
- Isuma ajunngilaq, kikkut tamarmik peqqinnerulissasut kisianni isumaqanngilanga akit taamatut qaffanneruliinnarlugit peqqinnerulissasut. Imaasinnaasoq peqqinnginneruliinnartugut.
Innuttaasulli tusarniaaffigineqaratillu atugarisaasa allanngortinniarneqarnerat, aqutsinerlunnerusoq Mariane Alaufesen isumaqarpoq.
Akitsuusersuinerit peqqinnerulernissamut aqqutaasorinngilai
- Innuttaasut qulaatiinnarlugit aaliangersaanerit peqqinnerulernissaq neqitsiullugu isumaqarpunga kusananngitsumik aaqqissuussinerit ingerlasut.
Pissakinnerusut ilungersortut eqqugaaqqittut taamma isumaqarpoq.
AAMMA ATUARUK Akitsuutit atuutilinnginneranni: Brugsenip sioraasat tunisartagai 12-eriaammik amerlisut
- Aap, akitsuusersuineq isummamingut ajunngilaq. Kisianni akitsuusersukkat taakkua innuttaasunut eqqorneqartunut malitseqartitsivigineqarneq ajorput. Ulluinnaat nammakkuminaareeqisut nammakkuminarsaqqinnissaannut.
Mariane Alaufesen KNR-imut taama oqarpoq.
