Akitsuutit atuutilinnginneranni: Brugsenip sioraasat tunisartagai 12-eriaammik amerlisut
Brugsenip pisiniarfiini ippassaq unnukkut ulapputtoqarpoq. Tassami sioraasat ataasinngormat kingullermik tunineqartut aqqaneq-marloriaataat ippassat tunineqarput.
Ulappunnermullu Inatsisartut akitsuutinik nutaanik, aningaasanut inatsimmi amigartooruteqarujussuarnermut matussusiinissaq tuaviortumik ippassaq suliarisaat pissutaavoq.
- Uanga nammineerlunga ippassaq unnukkut arfineq-marluk missaanni niuerniarpunga. Siuleriiaattoqarporlu. Piffissap taamaalinerani siuleriiaattoqanngisaannaraluarpoq, Brugsenip tuniniaanermi pisortaa, Jes Nyborg oqarpoq.
- Cigarettit 20-t 4 koruunit 40 øremillu akisunerulissapput.
- Sukkut puussiaq kilomut 4 koruunit 31 øremik akisunerulissaaq.
- Sukkulaatit, mamakujuit kiilumut 5 koruunimik akitsuuserneqassapput.
- Imigassaq aamma akisunerulissaaq. Imigassallu puiaasaani literimut qanoq annertutiginersoq apeqqutaalluni akitsorneqassalluni. Immiaaraq 33 centiliteriusoq 66 øremik akisunerulissaaq.
Brugsenip kujataanit Nanortalimmiit avannaanut Ilulissanut pisiniarfiini ulapputtoqartoq, Jes Nyborgip oqaatigaa. Tuniniaanermi pisortap oqarnera naapertorlugu Brugsenip ataasinngormat siuliani tunisaanit ippassaq tunisat 40 procentimik amerlanerupput.
- Assersuutigalugu ataasinngormat kingullermik sioraasat 300 kiilut tunivagut. Ippassaq 3.700 kiilut tunivagut. Tunisat 12-eriaammik amerlanerupput, Jes Nyborg oqarpoq.
Tupat 86,50 koruunimut akitsussasut
Akitsuutit nutaat naapertorlugit cigarrettit 20-t 82 koruunimiit 86,50 koruunimut akitsussapput.
SIoraasat aamma taamatungajak akitsussapput: Tassa 21,95-imit 26,50 koruunimut akitsussallutik.
AAMMA ATUARUK Brugsenimi niuerniat akitsuutit nutaat pillugit: Silatusaarneq - sianilliorujussuarnerluunniit
Immiaaraq Carlsbergimeersoq 18,50 koruuneqartoq 19,25 koruuneqalissaaq. Mamakujuillu aamma akitsussallutik.
- Mamakujunnik Haribonik puussianik, 375 gramimik oqimaassusilinnik tunisarpassuaqartarpugut. Taakku 65 koruuneqartut 2 koruunimik akitsorneqassapput. Sukkalaatit mikisut 50 ørep missaanik akisunerulissapput, Jes Nyborg oqarpoq.
Naalakkersuisut oqarnerat naapertorlugu akitsuutit nunatta karsianut 45 millionit koruuninik ukiumut iluanaarutaassapput, naallu akitsuutit unnup-qeqqanit atuutileraluartut nioqqutissat tamarmik maanna akitsussanngillat. Tassami akitsuutit nioqqutissanut pisiniarfinnit ullumikkumit inniminnerneqartunut peqqussutaapput.
Aviisit neqeroorutit ukiup sinneranut piareereersut
Nioqqutissalli neqeroorutaasut allanngussanngillat. Pisiniarfinnit neqeroorutit ukiup sinneranut atuuttussat naqitigaareernerannik tamanna pissuteqarpoq.
- Nioqqutissat akii ilisimareerlutigit naatsorsuutigigatsigu taamaaliorpugut. Akillu ataasinngornermiit marlunngornermut qaffariataarneranni unammillernartoqassaaq. Nioqqutissammi akii neqeroorutitsinni allassimasut malillugit tuniniassavagut, taamaalillutalu akitsuutit nutaat pissutigalugu annaasaqarluta, Jes Nyborg oqarpoq.
AAMMA ATUARUK Aningaasanut inatsit: Sikaritsit, imigassaq, sukkut, sukkulaatit mamakujuttullu akitsorput
Brugseni taamaalilluni akitsuutit nutaat pissutigalugit neqeroorutiminiittut nutaallu akitsuusikkat assigiinngissutaannut aamma akileeqataassaaq,
- Tamanna uagutsinnut soorunami iluarisimaarnanngilaq. Akitsuutit ullormiit ullormut qaffanneqarnerat suliffeqarfimmik ingerlatsisuulluni ajornakusoortorujussuuvoq. Aningaasanik annaasaqassaagut – tamannalu avaqqunneqarsinnaanngilaq, Jes Nyborg oqarpoq.
KNR Pisiffimmit apersuiniaraluartpoq, tamannali suli iluatsissinnaanani.
