Aappaluttoq: Akiliisinnaajunnaarnermit rubininut
Qaammatini arlalinni suliaqarluareerlutit piiaavimmik Aappaluttumik rubiineqarfiulluartumik piginnittut pisortatigoortumik ammaanersiornissaminnut piareerput.
Taamaalilluni Qeqertarsuatsiaani piiaavik, piginnittuusimasut True North Gems Greenland, Naalakkersuisunit ukiut pingasut matuma siorna akuersissummik tunineqarsimasut ukioq kingulleq septembarimi akiliisinnaajunnaarneratigut oqaluttuaannanngorsimagaluartoq inerneqarallarpoq.
AAMMA ATUARUK Qeqertarsuatsiaat eqqaani rubinisiorfik LNS Greenlandip ingerlatilertussanngorpaa
True North Gems suliamik aallartitsinissamut millioninik arlalinnik amigaateqartoq akiliisinnaajunnaartup pigisisaanik nakkutiginnittup nassuiaatigaa.
- Tassa aallartinnissamut 100 millionit koruunit amigaatigineqarput, eqqartuussissuserisoq, akiliisinnaajunnaartullu pigisaanik nakkutiginnittoq, Peter Schriver Nuna Advokatineersoq oqarpoq.
Taassuma oqaatigaa, piiaavimmut aningaasaleerusuttut soqutiginnittut naammassimanngitsut.
- Taakku aningaasaliisut aarlerinartunik naliliinerminni isaatitsinissamut periarfissat misissorsimarpasinnginnguatsiarpaat. Aningaasaliisulli ataasiakkaat sooq tunuarnerannut ilisimasaqanngilanga, Peter Schriver oqarpoq.
AAMMA ATUARUK Qeqertarsuatsiaat eqqaanni rubinisiorfik ingerlaqqissinnaanngortoq
Nunatta karsianut iluanaarutaangaatsiartussatut naatsorsuutigisaagaluit ukiumik ataatsimik kinguaattoorput. True North Gems Greenlandip nammineq naliliinerata takutippaa piiaavimmiit rubiinat nunatta karsianut 930 millionit koruuninik ilunaarutaassasut.
Suliffeqarfik rubinisiorfimmik 2008-mi ammaaniarluni qinnuteqarmat naliliinerat imaappoq nunatta karsia ukiuni qulingiluani rubinisiornerup ingerlanerani 90 millionit koruuninik pisuujunerulissasoq.
AAMMA ATUARUK Rubininik piiaavik qaammammik ataatsimik kinguartoq
True North Gemsilu akiliisinnaajunnaarnissamut qaammatialuit siornatigut ingerlalluanngitsoq takuneqarsinnaalerpoq. Suliffeqarfik juulip qaammataani aningaasanik amigaateqalerpoq taamaammallu piiaavimmi sulisunik soraarsitsilluni.
Akiliisinnaajunnaarnerata kingorna septembarip qaammataani norgemiut piginneqatigiiffiata LNS Greenland A/S-ip aningaasaliinernik aningaasaleerusuttunillu katerseriarluarluni piiaavimmut Aappaluttumut akuersissutip nanginnissaa iluatsippaa.
Taamani pilersaarut malillugu piiaavimmi suliaqarneq januaarip qaammataani ammarneqartussaagaluarpoq, arlaleriarlunili kinguartinneqarpoq. Piiaaneq qaammatini kingullerni ingerlanneqarpoq, piginnittullu pisortatigoortumik tusagassiutinut sisamanngornermi ammaanersiorsiorput, KNR-ilu soorunami peqataavoq.
AAMMA ATUARUK Rubinminen mangler penge
