True North Gems rubiinisiornissaminut aningaasanik amigaateqarpoq
True North Gemsip Qeqertarsuatsiaat eqqaanni rubiinisiorfissaa sanaartorlugu maanna naammassivaat, rubiinisiornissamulli aningaasanik suli amigaateqarpoq.
- Aningaasassaqanngikkutta inuit massakkut sulitiinnarsinnaanngilagut, True North Gems Greenlandimi pisortap tullersortaa Jens B. Frederiksen oqarpoq.
Piiaavimmimi aallartilluarnissamut pinnersaasiassanillu tuniniaanerup aallartinnissaanut aningaasaleeqataassutit 12 - 15 millioner dollarsit suli amigaatigineqarput.
- Aningaasarpassuit pineqarmata, soorunami isumaqatigiinninniarnerit sivisusarput. Massakkut isumaqatigiinniarnerit ingerlapput, taamaammat annertunerusumik oqaaseqarfigisinnaanngilakka.
True North Gems Greenland aningaasaliisinnaasumik maannakkut isumaqatigiinniartoq, Jens B. Frederiksen paasissutissiivoq, tamannalu iluatsissappat suliffeqarfik sulisussarsioqqilissaaq.
- Isumaqatigiinniarnerit inissippata atorfinitsitsineq ingerlateqqinneqassasoq naatsorsuutigivarput.
