Rubininik piiaavik qaammammik ataatsimik kinguartoq
Piiaaffimmit rubinit siulliit 2017-imi jannuaarip aallartinnerani aaneqarnissaat pilersaarutaagaluarpoq. Pilersaarulli taanna qaammammik ataatsimik kinguartoq, LNS Greenland A/S-ip siulersuisuini siulittaasua, Gunnar Moe nalunaaruteqarpoq.
- Sanaartorneq naammassikannereerparput, ajornartorsiutilli naapitsivugut. Atortussaq utaqqivarput, taannalu jannuaarip sisamaani tikissaaq, Gunnar Moe oqarpoq.
AAMMA ATUARUK Piginnittut ukioq kaajallallugu piiaarusuttut
Ingerlatsinerli ingerlalluartoq, suliffeqarfiup nalunaarutigaa, rubinilu siulleq piiaavimmiit aappaagu jannuarip naanerani februarillu aallartinnerani aatsaat aaneqarsinnaalissasoq naatsorsuutigaat.
- Tamanna anguniagaraarput, Gunnar Moe oqarpoq.
Suliffeqarfik True North Gems septembarip tallimaani Qeqertarsuatsiaat eqqaani rubiniornermi akiliisinnaajunnaartutut nalunaarumalluni qinnuteqarmat, LNS Greenland A/S-ip rubinisiorneq ukioq manna oktobarimi nangippaa.
Rubinit silinneqanngitsut Nunatsinniit ukioq naallugu annillugit nassiunneqartassasut suliffeqarfiup siusinnerusukkut nalunaarutiginikuua, tamaaliornissarli piiaaviup ajoqutigisaata aaqqiivigineqareernissaanut utaqqissuttariaqarpaa.
AAMMA ATUARUK Rubinisiornissamut akuersissutit LNS-imut tunniunneqartut
AAMMA ATUARUK Randi Vestergaard Evaldsenip LNS Greenland nersualaarpaa
