Assi: Flickr

Rubinisiornissamut akuersissutit LNS-imut tunniunneqartut

Rubinisiorfimmi Aappaluttumi rubinisiornissamut akuersissutit LNS-Greenlandimut tunniunneqarnissaat Naalakkersuisunit akuerineqarpoq.

Aatsitassanut naalakkersuisoqarfiup inassuteqaataata Naalakkersuisunit isummerfigineqarnerata kingorna tamanna paasinarsivoq. Naalakkersuisoqarfiup inassutigaa ingerlatseqatigiiffiup akiliisinnaajunnaartup TNGG-p akuersissutai LNS-Greenlandimut tunniunneqarsinnaasut.

- Akiliisinnaajunnaarnermik eqqorneqartup True North Gems Greenland A/S-ip rubinisiorfimmut Aappaluttumut atuisinnaanermut akuersissutaa LNS Greenlandimut tunniunneqartoq kalaallit oqartussaasuisa suliffeqarfik ullumi kalerrikkaa, LNS Greenland Gems A/S allappoq.

LNS-Greenlandip suliap pilertortumik suliarineqarnissaanik kissaataa Naalakkersuisunit taamaalilluni aamma malinneqarpoq, Aappaluttumi suliaqarneq aallartissinnaanngorluni, LNS Greenlandillu aamma naatsorsuutigaa qanittumi piiaalersinnaanissartik, taamaalillutillu kalaallit rubiinaataat tunisassiarineqarsinnaalersillugit, suliffeqarfik allappoq.

- Ukioq manna aallartissinnaaniassagutta suliap pilertortumik ingerlanneqarnissaa noqqaassutigalugu erseqqissaatigaarput, maannami ukiarsalerpoq, LNS-Greenlandip pisortaa Gunnar Moe taama oqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl