Air Greenlandimi piginneqataassutsit tamaasa pigilernerisigut nunarput pitsaasumik inississinnaasoq
-Kalaallit Nunaata isorartunera eqqarsaatigalugu timmisatuutileqatigiiffimmik ingerlalluartumik, ineriartortinneqarsinnaasumik kiisalu namminermut aammali Namminersorlutik Oqartussanut aningaasarsiorsinnaasumik pilersitsinissaq pingaaruteqarpoq, Sydbankimeersoq Jacob Pedersen oqarpoq.
AAMMA ATUARUK Air Greenlandimi piginneqataassutsit isumaqatigiinngissutaasut
Taanna nassuiaavoq nunaqarfiit illoqarfiillu akornanni kiisalu Kalaallit Nunaata avataanut angallassisarnerit pitsanngorsarneqarnissaat pingaaruteqartoq, sumiiffiit ataasiakkaat taamaalillutik qanitarisaminni aningaasarsiornikkut soorlu takornariaqarnikkut iluanaarutigineqartartunik iluaquteqarsinnaalerniassammata.
Air Greenlandimili piginneqataassutsit allanngortinngikkaluarlugit kissaatigisatut aaqqissuussisoqarsinnaareertoq unnerpaa, pineqartorlu tassaagunarnerarpaa kikkut aalajangiisartuunersut, taamalu pissaanermik tigumminnittuussanersut. "Oqariartortarfiit pingasuunatik ataasiinnanngortinneqarnissaat" IA-p siunnersuuteqarnerminni tunngavilersuutigaa. Jacob Pedersen tamatumunnga isumaqataavoq:
-Piginneqataasut pingasuunerat, taamalu soqutigisat assigiinngitsuunerat unamminartoqarsinnaavoq. SAS-ip aningaasarsionissani soqutigisaraa kiisalu Namminersorlutik Oqartussat aamma danskit naalagaaffiat immikkut aamma soqutigisaqartuullutik.
AAMMA ATUARUK Air Greenlandip nunatsinnit tamakkiisumik pisiarineqarsinnaanini tapersersorpaa
AAMMA ATUARUK Air Greenland tamakkiisumik pigilertigu
Air Greenlandimik piginnittut pingasuutillugit isumaqatigiittoqartuaannarnissaa angusallu kusanartuujuaannarnissaat ilimaginagu Sydbankimeersoq Jacob Pedersen aamma oqarpoq.
