Air Greenland matusineq pillugu: Timmisartukkut angallanneq erngertumik unitsinneqarpoq
Coronamik tunillanneqarsimasut nutaat tallimat paasineqarput. Tamanna nakorsaanerup, Henrik. L. Hansen ualimut tusagassiortunik katersortitsinermi uppernarsarpaa.
Tamanna pissutigalugu Nuummiit timmisartukkut angallammik umiatsiamilluunniit ilaalluni aallartoqaqqusaajunnaarpoq, angalaqqusiunnaarnerlu qaqugu tungaanut atuutissanersoq suli ilisimaneqanngilaq.
AAMMA ATUARUK Nuummi tuniluuttoqaqqilersoq: Tunillatsissimasut nutaat tallimat paasineqartut Nuummiillu aallartoqassanngitsoq
Air Greenlandip timmisartumut ilaasussat pineqartut attaveqarfigineqareersigai, Air Greenlandimi Sullitanut kiffartuussinermi pisortap oqaatigaa.
- Tusagassiortunik katersortitsinermi paasitinneqarpugut Nuumminngaanniit avammut tassa nunatta sineriaanut unitsinneqassasut, taakkulu maleruaqquneqartut Air Greenlandimiit malippagut, Air Greenlandimi Sullitanut kiffartuussinermi pisortaq, Helle Pedersen oqarpoq.
- Massakkut kisitsisaatiginngilakka, kisianni timmisartut ualimut Nuumminngaanniit aallartussat unitsinneqarput, massakkorpiaq sulissutigivarput ilaasussat sumiiffiisa piaartumik katersornissaat, sulilu kisitsisinngorlugit piginngilakka, taanna oqarpoq.
AAMMA ATUARUK Kalaallit Airportsimi sulisoq tunillatsittunut akuusoq
Nuummut akunnilluni minnerit aamma ullumikkumiit unitsinneqarput.
- Nuummiit allartussat tamarmik ullumikkut taamaatinneqassasut maannamut ilisimatinneqarpugut, Helle Pedersen oqarpoq.
Sarfik Ittummiittut covid-19-imik tunillatsissimasinnaanngitsut
KNR-ip aamma Arctic Umiaq Line attavigaa, taakku pisortaniit tutsiuttoqarnissaa utaqqigitsik oqaatigaat.
Umiarsuaq Sarfaq Ittuk Nuummiit ullaaq aallarpoq, tassa suli angalaqqusiunnaarnermik nalunaarut kalerriutigineqanngikkallarmat. Massakkorpiarlu pisortaniit misissorneqarpoq, umiarsuarmi ilaasut Coronamik tunillanneqaratarsimasinnaanerat.
Umiarsuarmi ilaasunit 76-init tunillatsissimasumut qanillisimasoqaranilu tunillatsissimasinnaasoqanngitsoq umiarsuaatileqatigiiffiup pisortaata, Avíaja Lyberth Lennerthip nalunaaqutaq ualimut sisamat missaani paasissutissiissutigaa.
Apersortittoqarnerani kaffillernermi tuniluuttoqartoq
Tunillatsissimasunit nutaanit tallimanit pingasut arfininngormat apersortitsisoqarnerani kaffillernermi nereqatigiinnermilu tunillatsipput.
Taamaammat inuit aaqqissuussinernut peqataasut 200-t tikillugit amerlassuseqartut ullumi nalunaaqutaq 12.30-mit misissortikkiartornissamut neqeroorfigineqarput.
Taamaakkaluartorli pissutsit nakkutigineqarsinnaasut nakorsaaneq naliliivoq.
- Attaveqarfiit sumiinnersut ilisimavagut. Inuit 200-t missaannik amerlassuseqarsinnaanerat ilisimavarput. Kisianni ilisimavarput nalunagu tunillatsissimasut piffissami sivikitsuinnarmi tunillaasimasinnaasut. Taamaalilluta nakkutiginnissinnaanerput qularutiginngilarput, nakorsaaneq oqarpoq.
AAMMA ATUARUK Tamaat isigalugu: Coronavirus pillugu killiffik
Inuk ataaseq tunillatsissimasoq Ilulissaniippoq.
Nuummi tuniluuttoqarnera pissutigalugu illoqarfiup ulluni sisamani matuneranit sapaatit akunneri pingasut qaangiupput. Tassani imerniartarfiit, timersortarfiillu matupput timmisartullu angalajunnaarlutik.
Matusineq ullunik sisamanik sivisussuseqarpoq.
Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.
Tunillatsissimasut sinneri angerlarsimapput.