Kalaallit Airportsimi sulisoq tunillatsittunut akuusoq
Inuit tallimat coronamic tunillanneqarsimasut ippassaq paasineqarpoq. Taakkunannga marluk Nuummi mittarfissualiortuni, Munck-gruppenimi sulipput.
Nukissiorfinni sulisoq tunillanneqartunut akuusoq Nukissiorfiup KNR-imut marlunngornermi ullaap tungaani uppernarsarpaa. Kalaallit Airportsimi sulisoq ataaseq, ippassaq tunillatsissimallutik paasineqartunut tallimanut akuuvoq.
Taamaattumik Kalaallit Airportsimi sulisut 21-it manna suliffimminniit angerlartitaapput angerlarsimaannaqqusaallutillu.
AAMMA ATUARUK Nuummi Nukissiorfinni sulisoq tunillatsissimasoq paasineqartoq
- Tunillanneqartutut suli uppernarsarneqannginnerani suleqatitsinnut sianeqattaarpunga nassuiaallugillu ullumi angerlarsimaannassasut. Taassumali kingorna paasivarput inuk taanna tunillanneqarsimasoq, Kalaallit Airportsimi pisortaaneq, Jens Lauridsen, KNR-mut oqarpoq.
Tallimanngornerup tungaanut angerlarsimaannassasut
Suliffeqarfimmi tassani allanik maannamut tunillatsissimasoqanngilaq. Taamaattoq tunillatsissimasoq taanna suleqatimik arfininngormat attaveqarsimasoq, pisortaq nassuiaavoq.
- Taakkua manna misissortipput angerlarsimaannarlutillu. Maannamut paasisagut malillugit uagut tunillaassuinngilagut, Jens Lauridsen oqarpoq.
Taanna aamma oqarpoq, Kalaallit Airportsimi sulisut tallimangornerup tungaanut angerlarsimaannassasut.
Apersortittoqarnerani kaffillernermi tunillatsittoq
Illoqarfiit pingaarnersaanni tallimat tunillatsissimasut nutaat ullaaq manna uppernarsarneqarmata timmisartukkut imaatigullu angallannerit unitsinneqaqqipput. Tamanna illoqarfimmi tuniluuttoqaqqilerneranik pissuteqarpoq.
Tunillatsissimasunit nutaanit tallimanit pingasut arfininngormat apersortitsisoqarnerani kaffillernermi nereqatigiinnermilu tunillatsipput. Taamaammat inuit aaqqissuussinernut peqataasut 200-t tikillugit amerlassuseqartut ullumi nalunaaqutaq 12.30-mit misissortikkiartornissamut neqeroorfigineqarput.
AAMMA ATUARUK Nuummi tuniluuttoqaqqilersoq: Tunillatsissimasut nutaat tallimat paasineqartut Nuummiillu aallartoqassanngitsoq
Taamaakkaluartorli pissutsit nakkutigineqarsinnaasut nakorsaaneq naliliivoq.
- Attaveqarfiit sumiinnersut ilisimavagut. Inuit 200-t missaannik amerlassuseqarsinnaanerat ilisimavarput. Kisianni ilisimavarput nalunagu tunillatsissimasut piffissami sivikitsuinnarmi tunillaasimasinnaasut. Taamaalilluta nakkutiginnissinnaanerput qularutiginngilarput, nakorsaaneq oqarpoq.
Inuk ataaseq tunillatsissimasoq Ilulissaniippoq.
Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.
Tunillatsissimasut sinneri angerlarsimapput.
