Nuummi Nukissiorfinni sulisoq tunillatsissimasoq paasineqartoq
Sulisup ataatsip covid-19-imik tunillatsissimanerata ataasinngornermi paasineqarnera pissutigalugu sulisut tamarmik ullumi angerlartinneqarput.
- Sulisutsinnik tunillatsissimasoqarpoq, peqinnissaqarfiullu tunillatsissimasinnaasut ujartuleruttorpai, Nukissiorfinni immikkoortortaqarfimmi pisortaq, Sune Tougaard oqarpoq.
Nukissiorfiit qullersaqarfiani sulisut 90-it missaanniittut ullup sinnera aamma angerlartinneqartut taassuma oqaatigaa, tamanna peqqinnissamik oqartussat innersuussuteqassappata sivitsorneqarsinnaavoq.
Qanoq tunillatsittoqarsimanera taassuma annerusumik oqaaseqarfigerusunngilaa, oqartussalli misissuileruttorput.
AAMMA ATUARUK Coronavirusimik tunillanneqarsimasunik Nuummi siumuisoqaqqittoq
Nuummi Nukissiorfiit qullersaqarfiata silataani biilit unittarfiat uninngaffigineqanngilaq, allaffimmullu isaariami allagartamik nivingasoqarpoq, allassimallunilu "Qullersaqarfik covid-19-imik paasisaqartoqarnera pissutigalugu matoqqavoq".
Nukissiorfiit sulisuminnik tunillatsittoqarsimanera KNR-imut uppernarsarpaat.
Nukissiorfinni sulisoq tunillatsissimasoq ullaaq manna kisimiilluni paasineqanngilaq.
Tamanna nakorsaanerup Henrik L. Hansen KNR-imut uppernarsarpaa.
Tunillanneqarsimasulli qassiunersut taassuma oqaatigisinnaanngikkallarpaa, qulinilli amerlanerunngitsut ilisimatitsissutigaa.
Nakorsaaneq corona pillugu aqutsisoqarfimmeersullu immikkut ittumik ataatsimiileruttorput, ataatsimeereerpatalu annerusumik paasissutissiisoqassaaq.
Covid-19-imik tunillanneqarsimasut allat marluk ippassaq ataasinngornermi unnukkut aamma siumorneqarput.
Taakku suliffeqarfimmi Nuummi mittarfiup tallilerneqarneranik sulialimmi, Munck Gruppenimi sulisuupput.
Nukissiorfiit isaariaani marlunngornermi ullaakkut nivingasoq. Assi: KNR