Coronavirusimik tunillanneqarsimasunik Nuummi siumuisoqaqqittoq

Coronavirusimik tunillanneqarsimasunik Nuummi ullaaq manna siumuisoqaqqippoq.

Nakorsaaneq, Henrik L. Hansen, KNR-imut taama ilisimatitsivoq. 

Tunillanneqarsimasut qassiunersut taassuma oqaatigisinnaanngikkallarpaa, quliniilli ikinnerusut ilisimatitsissutigalugu. 

Nakorsaaneq aamma corona pillugu aqutsisoqarfimmeersut immikkut ittumik ataatsimiileruttorput, ataatsimeereerpatalu annerusumik paasissutissiisoqaqqissaaq.

Covid-19-imik tunillanneqarsimasunik allanik marlunnik ippassaq ataasinngornermi unnukkut aamma siumuisoqarpoq.

AAMMA ATUARUK Coronavirusimik tunillanneqarsimasut marluk nutaat Nuummi siumorneqartut

Tunillanneqarsimasut marluk taakku suliffeqarfimmi Nuummi mittarfimmik tallilerisumi Munck Gruppenimi sulisuupput.

- Uissuumminarpoq, nappaatimmi siaruatsaaliornissaa pillugu assigiinngitsutigut suliniuteqaraluarpugut, mattusimatinnissaq taakkununnga ilaalluni. Kisianni tamanna iluaqutaasimagunanngitsoq maanna takusinnaalerparput, nakorsaaneq Henrik L. Hansen KNR-imut ippassaq ataasinngornermi unnukkut oqarpoq.

- Taamaammat nappaat qanoq ililluni siaruaassimasinnaanersoq maanna paasinialeruttorparput, nappaatip ingerlaannartumik siaruatsaaliornissaanut qanoq iliuuseqarsinnaaniassagatta, taanna oqarpoq.

Qanoq pisoqarsimanersoq politiit peqatigalugit paasiniaasoqaleruttorpoq, tunillanneqarsimasutut siumorneqartut kikkut qanillattorsimasinnaaneraat paasiniarneqarluni.