Coronavirusimik tunillanneqarsimasut marluk nutaat Nuummi siumorneqartut

Tunillanneqarsimasunik nassaartoqaqqippoq.

Inuimmi Covid-19-imik tunillanneqarsimasut marluk siumorneqarsimasut, nunatta nakorsaanerata Henrik L. Hansenip KNR-imut ilisimatitsissutigaa.

- Uissuumminarpoq, nappaatimmi siaruatsaaliornissaa pillugu assigiinngitsutigut suliniuteqaraluarpugut, mattusimatinnissaq taakkununnga ilaalluni. Kisianni tamanna iluaqutaasimagunanngitsoq maanna takusinnaalerparput, nakorsaaneq oqarpoq.

- Tunillanneqarsimasut nutaat marluk Nuummi unnummanna paasivarput, taakkualu Nuummi mittarfiup tallilerneqarneranut atatillugu suliffeqarfimmeersuupput, Henrik L. Hansen oqarpoq, nangillunilu:

- Taamaammat nappaat qanoq isilluni siaruaassimasinnaanersoq maanna paasinialeruttorparput, nappaatip ingerlaannartumik siaruatsaaliornissaanut qanoq iliuuseqarsinnaaniassagatta, taanna oqarpoq.

Qanillisimasinnaasaat ujaarineqarput

- Qanoq pisoqarsimanersoq politiit peqatigalugit paasiniaasoqaleruttorpoq, tunillanneqarsimasutut siumorneqartut kikkut qanillattorsimasinnaaneraat paasiniarneqarpoq. Mattusimatinnissamik peqqussutit unioqqutinneqarsimanersut paasiniarparput, nappaatip siaruatsaaliornissaa tassuunatigut sulissutigalutigu. Tamanna pillugu tunillanneqarsimasinnaasunik pilersaarutigisamit misissuinerunissarput aamma siunniupparput, nakorsaaneq KNR-imut oqarpoq.

Illoqarfimmi tunillaassortoqarsinnaaneranik takussutissaqanngikkallartoq taassuma oqaatigaa, kisianni taamaattoqaratarsimasinnaanera misissuiffigineqaleruttorpoq.