Nuummi tuniluuttoqaqqilersoq: Tunillatsissimasut nutaat tallimat paasineqartut Nuummiillu aallartoqassanngitsoq
Nuummi tuniluuttoqaqqilerpoq.
Tunillatsissimasoq ataaseq Ilulissani aamma passineqarpoq, illoqarfiillu pingaarnersaannit timmisartukkut angalasoqassanngilaq.
Tunillatsissimasummi tallimat nutaat ippassaq unnukkut unnuarlu paasineqartut, nakorsaaneq, Henrik L. Hansen paasissutissiivoq.
Tunillatsissimasunit marluk mittarfimmi sanaartortumit Munck Gruppenimeersuupput. Munck Gruppen coronamik tuniluuffioreerpoq, taamaammat sulisut akornanni nutaanik tunillatsittoqarnera nutaarsiassarujussuunngilaq.
AAMMA ATUARUK Coronavirusimik tunillanneqarsimasunik Nuummi siumuisoqaqqittoq
Tunillatsissimasulli nutaat pingasut Munck Gruppenimi sulisuunngillat. Taakku suliffeqarfimmi tassani sulisunut attaveqarsimapput, taamaalillutillu Munck Gruppenimi sulisut ineqarfiisa avataanneersuullutik. Qanillineqartut pingasut apersortittoqarneranut atatillugu kaffillernermi nereqatigiinnermilu tunillatsissimapput.
- Nuummiit ippassaq aallartoqarnissaanut atatillugu misissortittoqarpoq. Taakku suliffeqarfimmit angisuumit tuniluuffiusumeersuupput. Taakku Danmarkiliartussaapput nalinginnaasumillu misissuisoqarneranut atatillugu taakkunannga marluk tunillatsissimasut paasineqarput, nakorsaaneq oqarpoq.
- Taakkulu inunnut allanut ullut sisamat matuma siorna attaveqarsimapput. Taakku apersortittoqarneranut atatillugu kaffillertuniillutillu nereqatigiinnermut ilaasimapput.
Nalunaaqutaq 12.30-mit misissuisoqangaatsiassasoq
Tunillatsissimasut pingajuat Ilulissanut angalasimavoq.
Apersortittoqarnerani kaffillernermi inuit 200-t missaanniittut peqataapput - taakkulu tunillatsissimasinnaapput. Taamaakkaluartorli pissutsit nakkutigineqarsinnaasut nakorsaaneq naliliivoq.
- Attaveqarfiit sumiinnersut ilisimavagut. Inuit 200-t missaannik amerlassuseqarsinnaanerat ilisimavarput. Kisianni ilisimavarput nalunagu tunillatsissimasut piffissami sivikitsuinnarmi tunillaasimasinnaasut. Taamaalilluta nakkutiginnissinnaanerput qularutiginngilarput, nakorsaaneq oqarpoq.
AAMMA ATUARUK Nuummi Nukissiorfinni sulisoq tunillatsissimasoq paasineqartoq
Nuummi tuniluuttoqarnera pissutigalugu illoqarfiup ulluni sisamani matuneranit qaammat ataasiunngitsoq qaangiuppoq. Tassani imerniartarfiit, timersortarfiillu matupput timmisartullu angalajunnaarlutik.
Maannakkut timmisartukkut umiarsuakkullu illoqarfiit pingaarnersaannit angallannerit kisimik tuniluuttoqarneranit eqqugaapput. Taakku qanoq sivisutigisumik uninngaannartinneqassanersut ilisimaneqanngilaq.
Nunatsinni tunillatsissimasut nalunaarsorneqarsimasut katillugit 49-pput.
Maanna tunillatsissimasutut nalunaarsoqqasut qulingiluaapput.
Taakkunannga arfineq-pingasut Nuummiipput ataaserlu Ilulissaniilluni, taanna mittarfimmi sanaartornermi sulisussaavoq.
Tunillatsissimasut tallimat Nuummiittut mittarfimmi sanaartornermi suliaqartuupput.
Tunillatsissimasullu pingasut mittarfimmik sanaartornermi sulisuunatik. Taakku apersortittoqarnerani kaffillernermi nereqatigiinnermilu mittarfimmik sanaartortunit tunillatsissimapput.
- Pisariaqarallartillugu uninngaannassapput, aningaasaqarnermut nunamullu imminermut naalakkersuisoq, Asii Chemnitz Narup oqarpoq.
- Sakkortuumik iliuuseqartoqarnissaanik Naalakkersuisunut innersuussuteqannginnerput pissutsinik nakkutiginnilluarsinnaalluta isumaqarnitsinnik pissuteqarpoq. Qanimut malinnaaqqissaapugut. Piffinni allani tunillatsissimasunik paasisaqassagutta siunnersuuteqarnerput allanngorsinnaavoq, Henrik L. Hansen oqarpoq.
Taamaattoqassappallu politikerit innersuussinermut akuerseqqinnissamut piareersimasut, Asii Chemnitz Narup oqarpoq.
- Tunillatsissimasinnaasunik ujartuineq annertooq ingerlanneqaleruttorpoq, tamannalu ilungersunarpoq. Nakorsaanerulli innersuussuteqarnera pissutigalugu eqqissisimavugut, taamaattoqassappallu sukannernerusunik killilersuilernissamut piareersimavugut, taanna oqarpoq.
Apersortittoqarnerani kaffillerneq nereqatigiinnerlu pineqartoq ullut sisamat matuma siorna pivoq, peqataasullu 200-t missaanniittut politiinit attaveqarfigiortorneqaleruttorput. Taakku Brugsenip eqqaani misissuisarfimmut ullumi nalunaaqutaq 12.30-mit misissortikkiartorsinnaapput.
Nakorsaaneq: Angerlarsimaannartussaatitaanermik unioqqutitsisoqanngilaq
Munck Gruppenimi sulisut mittarfiup eqqaani mattusimatinneqartumiipput. Taakku pinsip kingorna tunillaassuuttoqalerneranilli mattusimatinneqalerput. Taava qanoq ilillutik sulisut ilaat tassannga anillutik apersortittunut peqataallutillu kaffillertuniissinnaappat?
- Inuit tassani "ungalusamiittut" nunatsinniilli aallartussat ungaluusamit anillassinnaatitaalertarput. Taamaalillutik angerlarsimaannartussaatitaanermiikkunnaarlutik. Taamaammat mittarfimmi sanaartornermit inuit ilaat piffissat ilaanni angerlarsimaannartussaatitaanermik pisussaaffeqannginnissaapput, Henrik L. Hansen oqarpoq.
Apersortittoqarnerani kaffillernermi nereqatigiinnermiluunniit peqataasimallutik attavigineqarsimaguit inuit 200-t tikillugit misissortikkiartorneranni misissortikkiartorsinnaavutit.
Inuit tunillatsiffigisimasaannut kaffillertunut neqatigiittunullu peqataasimanngikkuit ullumikkut misissortikkiartussanngitsutit, nakorsaanerup qinnutigaa.
- Angerlarsimaannartussaatitaanermik unioqqutitsisoqarsimaneranut paasissutissaateqanngilagut.
Munck Gruppen Ilulissani mittarfiliornermik aamma suliaqarpoq.
Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.
Tunillatsissimasut sinneri angerlarsimapput.