Air Greenland: Danmarkimiit nunatsinnut billetit ikittuinnanngorput
Air Greenlandimi billetit nungulertupallapput. Nunatsinnut angalanermi killilersuinerit qasukkarneqassasut arfininngormat oqaatigineqarpoq – tamannalu Air Greenlandimut nuannaarutissaavoq.
Coronamut killilersuinerit peqqutigalugu sapaatit akunneranut nunatsinnut tikissinnaasut 810-ugaluarput – taamaammallu aggustip aqqaneq aappaata tungaanut nunatsinnut billetit nunguttut sapaatit akunnerata siuliani nalunaarutigaat.
AAMMA ATUARUK Tikinnermi maleruaqqusat qasukkarneqartut: Ilaasut amerlillutik angerlarsimaannartariaarunnerlu
Ilaasullu tikissinnaasut juulip aallaqqaataaniit sapaatit akunneranut 1.000-inut amerlineqassasut Naalakkersuisut arfininngormat nalunaarutigaat. Akunnerilli marluk ingerlaneranni Air Greenlandimi billetit tuniniarneqartut amerlineqarput.
- Massakkut angalanissamut billetit 500-t sinnerlugit tunisimavagut. Tassanilu juulimi aggustimilu angalanissamut pisiarineqarput.
- Arfininngormat oqartussaninngaanniit nalunaarutigineqarmat akunnerup ataatsup marluk iluani , angalanissamut billetit amerlanerit tuniniaqqilerpagut, Air Greenlandimi attaveqaqatigiinnermut sulisoq, Sasha Kleist Sethsen oqarpoq.
Julia billetissaqalerpoq
Danmarkimiit nunatsinnut billetimik nunguussaagaluartut ilagaat Julia Wille. Taanna Ilisimatusarfimmi iliniarnerminut atatillugu Danmarkimi suliffimmik misiliivoq. Naammassigamilu nunatsinnut aasarsioriartorniarluni qilanaarpoq.
Nunatsinnullu billetisisoqaqqissinnaalersoq arfininngormat tusaramiuk, iluatitsivoq.
AAMMA ATUARUK Julia Wille Danmarkimiit bilitsersisinnaanngilaq: Angerlarusukkaluarpunga
- Juulip 19-iani aallassaanga. Nuannaaqaangalu tikissinnaasut amerlineqarnissaannik aallajangiisoqarmat, Julia Wille KNR-imut oqarpoq.
Tamakkiisumik akiuussusernikut angerlarsimaannartariaarupput
Kastrupimiit nunatsinnut tikissinnaasut juuli aallarnerfigalugu amerlineqassapput. Sapaatit akunneranut inuit 810-t tikissinnaagaluartut maanna sapaatit akunneranut 1.000-it tikissinnaalerput.
Angalanermi ataatsimi inissat 27-it pisortaqarfinnut inniminnerneqartassapput, tassani ilaapput napparsimasut, peqqinnissakkut sulisut aamma ilinniartut. Taassuma saniatigut Islandimiit sapaatip akunneranut angalanerit marluk tamarmik immikkut 30-nik ilaasoqarsinnaasut ammaavigineqassapput.
AAMMA ATUARUK Nakorsaaneq: Tamakkiisumik akiuussuserneqareersimaguit angerlarsimaannartariaarutissaatit
Tikittunut tamanut tikinnissamut annerpaamik akunnerit 72 iluanni coronamut misissortissimanermut uppernarsaasoqassaaq aamma sumut-immersuiffissaq immersorneqarsimassaaq.