Timersuutit arlariit nunani tamalaani anguniagallit aningaasaliiffigiteqqipput
Aningaasanut inatsit 2025-mut atuuttut Inatsisartuni akuersissutigineqarmat timersornermut aningaasaliissutit ukiunut sisamanut 30 millioner koruuninik amerlineqassasut isumaqatigiissutaavoq.
Maanna Elite Sport Greenlandimut tunniunneqartut 1,8 millioner koruunit atuutilerput. Agguaanermi siullermi kattuffiit pingasut pissarsipput.
- Aningaasat atorneqassapput nunanut allanut unamminernut sungiusaqatigiinnernullu. Aamma sungiusaqatigiittarnerit aallarteqqinnissaannut atorneqarsinnaapput. Kattuffiit aamma oqaloqatigineqarput pilersaarutaareersut saniatigut suliniutinik nutaanik aallartitsinissat pillugit, Elite Sport Greenlandimi allaffeqarfimmi aqutsisoq Muusaarannguaq Ostermann Søholm KNR-mut oqarpoq.
Elite Sport Greenlandimi siulersuisut qanittumi isumaqatigiissutinik atsioqatigisaat tassaapput assammik arsartartut kattuffiat TAAK, arsaattartut kattuffiat KAK kiisalu taekwondortartut kattuffiat GTF.
Kattuffiit taakku pingasut piffissami aggersumi suliassaqarput aningaasarpassuarnik naleqartunik.
Piviusunngortinnissaannut ikiuunneq
Arnat assammik arsartartut Islandimut sungiusariassapput inuusuttullu nunanut allanut unammisartut U-17-it VM-mut anngunniutissalutik. Silami arsaattartut aamma futsalertartut Europamukarlutik nunanut allanut unammissamaalerput. Taekwondortartut qanittumi aamma VM-mi peqataassamarput.
- Kattuffiit isumaqatigiissuteqarfigisavut anguniagaqarlutillu periusissamik peqareerput. Suliutaat pikkorinnerni timersortartoqarnermut tunngasuupput. Taakku tassaasinnaapput nunarsuarmi pissartanngorniunnerit Europamilu pissartanngorniunnerit. Aamma tassaasinnaapput OL-mut anngunniarluni suliniarnerit, Muusaarannguaq Ostermann Søholm nassuiaavoq.
- Allatut oqaatigalugu kattuffiit anguniagaqartuupput. Uagut assut oqaloqataarusuppugut anguniakkat piviusunngortinniarnerannut ikiuunnissarput pillugu. Taakku tassaasinnaapput sungiusaqatigiinnerit imaluunniit nunat tamalaat unammersuarnerini peqataanerit. Taakku uagutsinniit piumasaqaatini pingaarnerupput aningaliissuteqarnermut atatillugu, Muusaarannguaq Ostermann Søholm oqarpoq.
Maannamuugallartoq assammik arsartartut, arsaattartut aamma taekwondortartut pikkorinnernut aningaasaliissutit amerlineranni pissarsipput. Kattuffiilli allat maanna aamma Elite Sport Greenlandimi attaveqatigineqarput taakkununnga Elite Sport Greenlandimiit aningaasaliissutaareersut saniatigut aningaasaleeqqinnissaq siunertaralugu.
Ukiunut tulliuttunut landskarsip 30 millioner koruuninik aningaasaleeqinnissaa ukiunut missingersuusiorfiusuniiginnarallarpoq. Aappaagumut aningaasaliissutissat aalajangiiffigineqassapput 2026-mut aningaasanut inatsisissaq novemberip qeqqani akuersissutigineqarpat.
