Nuummi unnuk festivaliusoq eqqissisimasumik naggaserneqarpoq: - Ajunnginnerujussuuvoq

Politiit arfininngornermi ulapinnikooriarlutik unnuaq taanna annikinnernik suliaqarput — imigassartorsimallutilli biilersimasut pingasut pasillerneqarput nakuusertoqarsimaneranillu nalunaaruteqartoqarluni.

Allattoq Markus Valentin

oktobarip 05-at 2025 12:22

Nutserisoq Medea Olsen

Nuummi politiit arfininngornerup unnuaani "ulapittorujussuunikuullutik“, ippassaq taama ulapitsiginngillat.

Taamatut oqarpoq Kalaallit Nunaanni Politiini pigaartut pisortaat Heini Jacobsen.

- Unnuup siulianut naleqqiullugu ajunnginnerujussuuvoq. Soorunami nalinginnaasumik pisut, soorlu aalakoornerit, pisimapput, kisianni tigusarinnittoqaranilu peqquserluttuliortoqanngilaq.

Taamaakkaluartoq illoqarfiit pingaarnersaanni imigassartorsimatillutik biilertut naammattoorneqartut pingasuupput - tamarmik Akisuanerit Festivalip kingorna nipilersortoqareernerata kingorna naammattoorneqartut.

Kiisalu Nuummi nakuusertoqarnera pissutigalugu politiit ornigupput.

- Nalunaaqutaq 05.30 inuk unatarneqarsimasoq pillugu nalunaarutiginnittoqarpoq. Tamatumunnga atatillugu kina unataasimasuuneranut pasitsaassaqarpugut tamannalu ullumikkut suliaraarput, Heini Jacobsen oqarpoq.

Illoqarfimmi tillinniartoqartoq

Politiilli Nuummiinnaanngitsoq nalunaaqutaq sisamanut suliaqariartorput.

Nuummi aalakoortoqarnerani, Qasigiannguani pinerluttut arlallit tillinniarput.

- Pisiniarfimmi Easy2go-mi tillinniartoqarsimavoq, tassungalu atatillugu inuit arlallit pasillersimavagut, qassiunerilli oqaatigisinnaanngilakka, pigaartut pisortaat oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.