Air Greenland: Angallassinissamut piareeqqavugut
Air Greenlandip neriorsuutigaa ukiup tulliani angalanissamut billitsit tuniniarneqassasut isumaqatigiissutit inissinneqariarpata.
Namminersorlutik Oqartussat timmisartuutileqatigiiffimmiit maanna utaqqisaaginnalerput.
- Qulakkeerinnissut tusarliunneqariarpat, taava angallannermut pilersaarusiussaagut, kinguninngualu angalanissamut billetsit tuniniagaalissallutik. Angallaviit ilisimaneqareermata, taamaaliornissaq sivisunavianngilaq, qarasaasiamut ikkussuuteqqiinnagassaammata, Air Greenlandimi pisortaaneq Michael Højgaard oqarpoq, erseqqissarlugulu maannakkumut isumaqatigiissutaasup sivitsuinnarneqarnissaa suli qulakkiinnginnamikku.
Aamma atuaruk Kiffartuussinermik isumaqatigiissutit sivitsorneqalerput
Aapaagumut isumaqatigiissutissat naammasseriarpata, ullumikkutut timmisartuussissapput:
- Nunatsinni angallassinikkut siunissami aaqqiissutaalersussaq, ullumikkutut-issaaq, naak immikkuualuttortai oqaatigisinnaanngikkaluarlugit, tassami Namminersorlutik Oqartussat tamanna aalajangigarimmassuk. Kisianni tassa tunngaviatigut isumaqatigiissummik sivitsuinerussappat, ullumikkutut aaqqissuissaagut, Michael Højgaard oqarpoq.
Aamma atuaruk Arctic Umiaq Line: Nunaqarfinnut angallassineq annikinneruleriaannaavoq
Angalaniartunut toqqissiallannartoq
Kiffartuussinissamik isumaqatigiissutip qulakkeernissaata tungaanut ilaqutariit Nuummiit kujataanut juullisioriartussat uternissaat nalorninarsimasoq maanna angallassinerup ingerlaannarnissaa qulakkeerneqarmat ilaqutariinnut arfiniliusunut eqqissiallaataavoq.
Aamma atuaruk Kiffartuussinissamut isumaqatigiissut unittoortitsisoq
Suna Jakobsenimut tusagaq nuannerluinnarpoq, uini paninilu ilagalugit Qaqortumut juullisioriarnissamut billitsisereersimasumut uternissaq qulakkeerneqarmat:
- Nuaannaajallarujussuarpunga ilaquttakka juullisioqatiginissaannut, aammalu nunagilersimasatsinnut uternissarput utersinnaanngornerput toqqissiallannaqaaq, Suna Jakobsen oqarpoq, juullisioriareerunik uternissaminnut billetsisisinnaanngikkaluarlutik.
