Politikki Inuussutissarsiutit

Arctic Umiaq Line: Nunaqarfinnut angallassineq annikinneruleriaannaavoq

Namminersorlutik Oqartussat suliffeqarfiillu kiffartuussinissamut isumaqatigiissutaasa nutaamik isumaqatigiinniutigineqarnissaat kinguartinneqarpoq Inatsisartunut maanaannaq qinersisoqarnissaa pissutigalugu. Tamannalu Arctic Umiaq Linep nunaqarfinnut kiffartuussineranut ajorseriaataasinnaalluartoq, Arctic Umuiaq Linep pisortaata, Jette Larsenip oqaatigaa.

Sarfaq Ittuk avannaani, aggustip 3-at 2011

Allattoq Apollo Jeremiassen

oktobarip 10-at 2014 18:04

- Massakkut nalorninartoq tassaavoq, nunaqarfinnut angallassineq. Tassa angallassinerput annikinnerulersinnaalluarpoq. Kisianni sinerissami sinersortaatinik angallassineq annikillisinneqassanngilaq, tamanna pillugu 2016-mut isumaqatigiissuutit suli atuummata, Jette Larsen oqarpoq.

Arctic Umiaq Linep kiffartuussinissaq pillugu neqerooruteqaraluarpoq ukiunut 2015-mut, 2016-mut 2017-mullu atuuttussamik. Inatsisartunulli maanaannaq qinersinissaq pissutaalluni 2014-ip tungaanut isumaqatigiissut atuukkallaannassasoq, Jette larsenip oqaatigaa.

Aamma atuaruk Air Greenland: Angallassissanersugut qularnarallarpoq

- Isumaqatigiissut 2014-mut atuuttup ingerlatiinnarallarnera aningaasatigut ajoqutaassanngippat tamanna ingerlatiinnarallassavarput. Aningaasatigulli ajoqusiissappat kiffartuussinerput allatigut aaqqissuuttariaqassavarput soorlu akuttunerusumik angallassisariaqalernermik.

Arctic Umiaq Linep pisortaa, Jette Larsen oqarpoq.

Nunatsinni suliffeqarfiit katillugit aqqanillit kiffartuussinissamut neqerooruteqarput suli isumaqatigiinniutaanngitsunik. Naalakkersuisuugallartut ualeq manna ataatsimiipput, Nunatsinni kiffartuussinermut aaqqiissutaagallartussat ilaatigut oqaluuseralugit.