Air Greenland: Angallassissanersugut qularnarallarpoq
Kiffartuussinissamut isumaqatigiissut ukiumi nutaami atorunnaarpat nutaamillu isumaqatigiittoqarani Diskobugtimi, kujataani, Qaanaami tunumilu illoqarfiit qulingiluat eqqugaassapput.
- Januarip aallaqqaataaniit sumiiffinni pineqartuni angallassisoqarnavianngilaq, taamaammat massakkut isumaqatigiissutaagallartoq tallineqarnissaanut imaluunniit ulloq manna tikilligu isumaqatigiinniutit isumaqatigiissutigalugit aaliangiisoqarnissaa naatsorsuutigaara, Air Greenlandimi tuniniaanermi pisortaq Christian Keldsen oqarpoq.
Illoqarfiit pineqartut tassaapput; Qaanaaq, Qeqertarsuaq, Kangaatsiaq, Qaqortoq, Narsaq, Nanortalik, Tasiilaq kiisalu Nerlerit. Taakku innuttaasut 2015-imiit angallanneqarsinnaaneri qularnarallarpoq, Air Greenlandilu qanoq pisoqassanersoq oqarsinnaanngikkallarpoq.
- Kiffartuussinermut isumaqatigiissanersugut sunalu pilersaarutaanersoq Air Greenlandimi nalugallarparput. Tamanna Namminersorlutik oqartussat kisimi oqaaseqarfigisinnaavaat, Christian Keldsen KNRimut oqarpoq.
Taasuma erseqqissaatigaa illoqarfiit anginerit akornnani niuernerpalaartumik timmisartuussinerit ingerlaannassasut, taamaallaallu illoqarfiit sumiiffiillu taaneqartut kisimik kiffartuunneqarsinnaanissai qularnarallartoq.
Naalakkersuisut aaliangiissasut
Kiffartuusinermut isumaqatigiissutaagallartoq sivitsorneqassanersoq Naalakkersuisuugallartut ullumi pingasunut ataatsimiissutigissagaat, angallannermut naalakkersuisuugallartoq Vittus Qujaukitsoq KNRimut ilisimatitsivoq.
