Kiffartuussinermik isumaqatigiissutit sivitsorneqalerput
![Sarfaq Ittuk](/sites/default/files/styles/image_934x467/public/article_images/sarfaq_ittuk_ved_ei_foto_branding_greenland_630_0.jpg?itok=HyJDSqQj)
Aningaasaqarnermut akileraartarnermullu ataatsimiitsitaliap naalakkersuisuugallartunut arlaleriarlutik innersuussutigaat kiffiartuussinissamut isumaqatigiissutit maanna atuuttut nutarterneqaratik sivitsorneqassasut.
Naalakkersuisuugallartuni akisussaasup inernerisaa ugguaraa pitsaannginnerarlugulu, taamaakkaluartoq innersuussaq malissallugu naqissuserpaa.
Aamma atuaruk Kiffartuussinermut isumaqatigiissutit sivitsuinnarneqalerput
Kiffartuussinissamut isumaqatigiissutit sivitsorneqarnissaat aalajangiunneqarput, aningaasaqarnermut ataatsimiitsitaliap naalakkersuisuugallartut isumaqatigiinniassutaat marloriarlutik akuerinngereeraallu:
- Ataatsimiitsitaliat kissaataat malillugu ulluni qaninnerni silaannakkut angallannerup tungaatigut isumaqatigiissutip sivitsorneqarnissaannik noqqaassuteqartussanngorpugut taassumap malitsigisaanik, Nunamut Namminermut Naalakkersuisuugallartoq Vittus Qujaikitsoq taama oqarpoq.
Ulluni kingullerni arlalinni imaatigut silaannakkullu kiffartuussinermut isumaqatigiissutit oqallisaareersullu Naalakkersuisuugallartut taama aalajangiipput.
Aamma atuaruk Arctic Umiaq Line: Nunaqarfinnut angallassineq annikinneruleriaannaavoq
Sivitsuinissaq inatsisartut utaqqiisaasumik aningaasanut inatsisissatut akuerisaanniit amerlanernik aningaasartuuteqarnerunissamik kinguneqassaaq.
- 10 millionit sinnerlugit aningaasartuuteqarnerulernissamik kinguneqartussaavoq, Vittus Qujaikitsoq taama oqarpoq.
Kiffartuussinermut isumaqatigiissutip sivitsornera aningaasartuutaanerussasoq qulakkeerneqareersoq aningaasaqarnermut ataatsimiitsitaliap nalunaarutigaat ukiup tullissaani akisunerulernissaa aningaasartalerneqassasoq akueralugu:
- Ataatsimiitsitaliarlu isumaqatigiittoq Naalakkersuisunut ullaaq manna allakkamik ingerlatitaqarpoq, kiffartuussinermut isumaqatigiissut maannakkut atuuttoq ukiumik ataatsimik sivitsorneqassasoq, taama oqarpoq Aningaasaqarnermut Ataatsimiitsitaliami siulittaasoq, Jens Immanuelsen Siumumeersoq.