Kiffartuussinermut isumaqatigiissutit sivitsuinnarneqalerput
Kiffartuussinissamik isumaqatigiissutaareersoq sivitsorneqassappat, siunniutaasunit aningaasanik 10 millioner koruuninik amerlanernik atuisoqassaaq. Taamaakkaluartoq aningaasaqarnermut ataatsimiitsitaliap nalunaarutigaat kiffartuussinissamik isumaqatigiissutaasoq ukiup tullissaani sivitsorneqassasoq akisunerulernissaalu aningaasartalerneqassasoq.
- Taamaaliorusuppugut iluamik aammalu pitsanngoriaataasumik isumaqatigiissusiortoqarnissaa qulakkeerniarlugu, aningaasaqarnermut ataatsimiitsitaliami ilaasortaq Aqqaluaq B. Egede KNR-imut taama oqarpoq.
Aningaasaqarnermut ataatsimiititaliami siulittaasup Jens Immanuelsenip siumumeersup KNR-imut uppernarsarpaa ataatsimiitsitaliaq isumaqatigiittoq kiffartuussinermut isumaqatigiissutaareersoq allanngortinnagu ukioq ataaseq sivitsorneqarnissaa innersuukkaa:
- Ataatsimiitsitaliarlu isumaqatigiittoq Naalakkersuisunut ullaaq manna allakkamik ingerlatitaqarpoq, kiffartuussinermut isumaqatigiissut maannakkut atuuttoq ukiumik ataatsimik sivitsorneqassasoq, Jens Immanuelsen taama oqarpoq.
Aqqaluaq B. Egedep oqaatigaa kiffartuussinissamut isumaqatigiissutiginiakkat iluanni Qeqertarsuup Tunuani kujataanilu angallannerup ajorsinissaa aammalu angallannerup taakkunani akisunerulernissaa, misissukkat takutimmassuk, isumaqatigiissutiginiarneqartunut akerliullutik.
Ugguarpoq
Nunamut namminermut Naalakkersuisuugallartup Vittus Qujaikitsup kiffartuussinermut isumaqatigiissutip sivitsuinnarneqarnissaa uggoraa, kingunerisassai peqqutaallutik:
- Utoqqaat pensionisiaqartut akikillisaaffigineqartarnissaannut isumaqatigiissut atorunnaartussanngorluni, aammali sumiiffiit ilaanni pitsanngoriaataasussat piviusunngortussaajunnaarmata, Vittus Qujaikitsoq oqarpoq.
Aqqaluaq B. Egedellu kiffartuussinermut isumaqatigiissutip sivitsornissaanut tunngavigisaasa ilagaat, qinersinissap suaarutigineqarnerani naalakkersuisuugallartut nutaanik suliaqaqqusaajunnaartarmata:
- Taamaammat suliat unittariaqarput, aammalu isumaqarpunga torersumik sulineq aallartissappat tamanna naalakkersuisut paasisariaqaraat, Aqqaluaq B. Egede oqarpoq.
Sipporussinngillat
Vittus Qujaikitsulli erseqqissarpaa, Inatsisartut aningaasanut inatsisaagallartoq Inatsisartunit qinersinissap nalunaarutigineqarneqarani akuerisaanniit pisinnaatitaaffilerneqarlutik.
- Pisinnaasagut sipporlugit uani iliuuseqanngilagut, kisiannili inatsisartut naalakkersuisuugallartunut piginnaatitsissutaata iluani taamatut iliuuseqaratta, Nunamut namminermut Naalakkersuisoq taama oqarpoq.
