Inatsiartuni nalunaaquttap akunnerini qulingiluani oqallisingaatsiartoqareersorlu kiisami ataatsimiinneq naavoq.

Oqallinneq aallartippianngitsorluunniit unitsinneqarpoq. Aalisarnermummi ataatsimiititaliami suliat allanut oqaatigeqqusaanngitsut ingerlateqqinneqarsimammata Siumup aalisarneq pillugu oqaaseqartartua, Karl Tobiassen, ataatsimiinnerup unitsinneqarallarnissaanik kissaateqarpoq.

Unikkallareernerup kingorna illuatungiliuttut apeqquteqaraangamik nipitusangaarmata Inatsisartut siulittaasuat, Mimi Karlsen (IA), nipaalliallaqqusilluni piumaffiginnippoq.

Inatsisissap kingunerisassai Nalakkersuisunit illuatungiliuttunillu isumaqatigiinngissutaaqisut

Politikerit aalisarnermut inatsisissamik ullup annersaa oqalliseqarput, isumaqatigiiffiuallaanngilarli.

Nutaamik inatsiseqalerneq aalisartut atugaasa nutarterneqarnissaannut pisuussutillu inunnut amerlanerusunut iluaqutaalernissaanut aqqutissiuissasoq naalakkersuisoqatigiit naqissuserpaat.

- Nunatsinni inuussutissarsiutit pingaarnersaata inuiaqatigiinnut atugarissaarnitsinnullu iluaqutaanissaa anguniarlugu pitsaanerpaamik inatsisiliorusuppugut, aalisarnermut naalakkersuisoq Kim Kielsen (S) oqarpoq.

Aalisarnermulli inatsisissaq suliffippassuarnik annaasaqarfiussasoq illuatungiliuttut isumaqarput.

- Inatsisip aalisartuuneq aserussavaa inuiaqatigiillu tamarmik eqqugaassapput. Uagut, immikkut ilisimasallit inuussutissarsiortullu isornartorsiutaat tusaanngilasi, Demokraatineersoq Jens-Frederiksen Nielsen oqarpoq.  

Naleqqap siulittaasua, Pele Broberg, tapersiivoq. 

- Aasianni tunisassiorfik aarlerinartorsiortoq Polar Seafoodimit oqaatigineqareerpoq. Tamanna tusagassiorfinni atuarneqarsinnaavoq. Taama pisoqarnaviannginneranik oqarnersi sumik tunngaveqarpa, Pele Broberg aperivoq.  

Tatiginnikkunnaarneq pinngitsoortinneqartoq

Atassut Kim Kielsenimut tatigiunnaarami tatiginnikuunnaarnermik taasititsinissamik unnukkiartulersoq siunnersuuteqarpoq, taakkumi naalakkersuisoq illuatungiliuttunut eqqunngitsumik pasilliisimasoq isumaqarput.

- Naalakkersuisoq erseqqissaanngilaq suna illuatungiliuttut inuiaqatigiinnut puupassaarinertut nipilimmik inatsisissami pisimaneraat. Taamaalillunilu avammut inuiaqatigiinnut eqqunngitsumik illuatungiliuttut partiivinut nivinngaalluni.

- Partiit illuatungiliuttut Inatsisartuni ilaasortaatitaqartut inatsisissamut ernummateqarnermik aallaaveqartumik saqqummiussaqarsimanerat pisinnaatitaaffiuvoq naalakkersuisumillu nipangersarneqartussaatitaanani, Atassutip siulittaasua Aqqalu Jerimiassen oqarpoq.

Naak Atassut illuatungiliuttut sinnerisa taperseraluaraat, Kim Kielsen naalakkersuisoqatigiinnit annaanneqarpoq.

Taasinermi 19-it akerliupput qulit akuersisut, taamalilluni Kim Kielsen naalakkersuisuuinnarpoq.

Aalisarnermut inatsisissatut siunnersuut aalisarnermut ataatsimiititaliamut ingerlateqqinneqarpoq. Siunnersuut pilersaarutit malillugit sisamanngornermi maajip 16-ni pingajussaanik oqaluuserineqassaaq.