Aalisarnermut inatsisissamik aappassaaneerluni oqaluuserinninneq aalisarnermut naalakkersuisup, Kim Kielsenip (S), pilersaarutit malillugit ammarpaa. Oqaluuserineqartoq upernaakkut ataatsimiinnermi qularutissaanngitsumik oqaluuserineqarnerpaavoq.

Inatsisartut ataatsimiittarfiat tusarnaartullu issiavii ulikkaarput.

Oqallinneq aallartilaaginnartoq Karl Tobiassen (S) oqaaseqarpoq ataatsimiinnerullu unikkallarnissaanik kissaateqarluni. Aalisarnermummi ataatsimiititaliamit paasissutisanik ingerlateqqitassaanngitsunik ingerlatitseqqiisoqartarsimasoq Karl Tobiassen isumaqarpoq.

Taamaattumik aappassaanik oqaluuserinninneq akunnerup affaani unikkallartinneqarpoq.

Sivisujaamik unikkallartoqareersoq oqallinneq aallarteqqippoq. Paasissutissanik ingerlatitseqqiisoqartarsimanera pillugu suliamik Inatsisartut Siulittaasoqarfiannut anngussisoqarsimasoq oqaatigineqarpoq, sunali pineqarnersoq erseqqinnerusumik nassuiaatigineqanngilaq.

Oqallinneq pikkunarsisartoq

Unikkallarneq illuatungiliuttunut nukkaallatitsisimarpasippoq.

Demokraatinit, Atassummit Naleqqamiillu apeqquteqartut oqalullutik nipitusangaarmata inersuaq akisualaartuinnaavoq mikrofonillu pisariaqarpasikkunnaarpulluunniit.

Inatsisartut siulittaasuat, Mimi Karlsen (IA), apeqquteqartunik nipaalliallaqusivoq – nipaalliallalunili oqalunneq sivikitsuinnaavoq.    

Naalakkersuisoqatigiit aalisarnermut inatsisissap aalisartunik ikilisitsinaviannginneranik oqaaseqarnerat illuatungiliuttut apeqquserpaat – taamaattoqanngitsorli naalakkersuisut isumaqarput.

- Inatsisissaq tunitsivinnut aalisartunullu sunniuteqassanngilaq. Nunatsinni inuussutissarsiutit pingaarnersaata inuiaqatigiinnut atugarissaarnitsinnullu iluaqutaanissaa anguniarlugu pitsaanerpaamik inatsisiliorusuppugut, Kim Kielsen oqarpoq.

Demokraatilli siulittaasuat, Jens-Frederik Nielsen isumaqataanngilluinnarpoq.

- Inatsisip aalisartuuneq aserussavaa inuiaqatigiillu tamarmik eqqugaassapput. Uagut, immikkut ilisimasallit inuussutissarsiortullu isornartorsiutaat tusaanngilasi, taanna oqarpoq.  

Naleqqap siulittaasua, Pele Broberg, tapersiivoq. Taassuma tusagassiorfiit allaaserisarpassui paarai, naalakkersuisorlu paasissutissanik tusarnaannginnerarlugu isornartorsiorpaa.    

- Aasianni tunisassiorfik aarlerinartorsiortoq Polar Seafoodimit oqaatigineqareerpoq. Tamanna tusagassiorfinni atuarneqarsinnaavoq. Taama pisoqarnaviannginneranik oqarnersi sumik tunngaveqarpa, Pele Broberg aperivoq.