Aarrup nunatsinneersup saarngi Kyiv-imi

Itsarnisarsiuut Ukrainep illoqarfiisa pingaarnersaanni ukiut 15-it matuma siornagut assaatillutik nassaaraat uumasup suugaluarnersup saarngisa ilaat qulingiluat.

Saarngit uumasumit sorlermeernersut itsarnisarsiuut aallaqqaammut eqqoriarsinnaasimanngilaat.

Saarngilli misissoqqissaarneqareermata suminngaanneersuunerat assut tupaallaatsitsimasoq, Ukrainep ilisimatusarfiani itsarnisarsiooq assaanermillu aqutsisoq, Natalia Khamaiko, Norgemiut nutaarsiassaqartitsiviannut Gemini.no-mut oqaluttuarpoq.

Paasineqarpormi saarngit aarrup saanerigai:

- Kyiv-imilu taamaattunik siornagut nassaartoqarsimaneranik tusarsimanngisaannarpugut, Natalia Khamaiko unnersiorpoq.

Nioqqutissaq piumaneqarluartoq
 

Qallunaatsiaat nunatsinniikkallaramik aarrit tuugaavinik Europamiunit piumaneqarluartarsimasunik niueruteqartarsimasut ilisimaneqarpoq.

Kisianni itsaq nunatsinnit nioqqutaasartut ungasissorsuarmi Ukrainemut annguttarsimanerat uissuummissutigineqarpoq.

Norgemiut radioqarfiat NRK naapertorlugu aarrup niaquata saarnga siullermik Norgemut Slesvigimulluunniit nassiunneqarsimassangatinneqarpoq. Tassanngaanniillu Kyiv-imut anngussimanissaa ilimagineqarpoq.

Aarrup saarngi Ruslandip eqqaani Barentsip imartaaneersuussangatinneqartarsimagaluarput.

Sukumiinerusumilli misissoqqisssaarneqarmata paasinarsivoq Atlantikup avannaaneersuusut.

-Aarrup saarngisa Kalaallit Nunaanneersuunerat uissuummissutigisatsinnik paasivarput.

Kisianni Kyiv qangarsuaq maannalu nunanik kangianiittunik niueqateqarnermi qitiusorujussuarmik inissisimammat, nioqqutit qangarsuaq Kalaallit Nunaanneersut Ukrainemut allaat annguttarsimanissaat ilimagineqaannarsinnaavoq. James Barret, Norgemi Trondheimip ilisimatuussutsimut katersugaasiviani professori itsarnisarsiooq NRK-mi taama issuarneqarpoq.

Ukrainemi aarrup niaquata saarnginik nassaat pillugit misissuinermi paasisat uani atuarneqarsinnaapput.