FUTURE GREENLAND Aaqqissuisuunerup Naalagaaffeqatigiinneq nukittorsarneqartariaqarsoraa
Aningaasarsiornerulissagutta Nunatta naalagaaffeqatigiinneq nukittorsartariaqarpaa, qallunaallu suliffeqarfii amerlanerusut nunatsinnut aggersarlugit.
Aatsaat taamaaliornikkut Nunatsinni naalakkersuinikkut ingerlatsineq patajaatsuusoq aningaasaliiffigissallugulu soqutiginartuusoq avatitsinnut takutissinnaavarput. Qallunaat aviisiata ullormut saqqummersartup, Politikenip, aaqqissuisuunera Bo Lidegaard taama oqarpoq.
Aamma atuaruk Politiken: Nunasiaataasimanermik oqalunnerup Kalaallit Nunaat innarlerpaa
Bo Lidegaardip inuussutissarsiorneq pillugu ataatsimeersuarneq Future Greenland, ippassaq naammassisoq, peqataaffigigamiuk takorluugaa ersarippoq.
Kalaallit Nunaata Qallunaat Nunaannut qilerutini pimoorullugu sukatertariaqarpai qallunaallu suliffeqarfiutaat aggersarlugit. Nunani tamalaarpassuarni inuussutissarsiortunut Nunarput soqutiginartunngortinniarniaraanni aqqutissat pingaarnerit ilaat taamaappoq.
- Kalaallit Nunaat avataniit qimerlooraanni, Kalaallit Nunaat Danmarkilu imminnut ataqatigiittuupput. Taamaammat nunani allani aningaasaliisartut qallunaanik aningaasaliisoqarsimanersoq qallunaallu suliffeqarfiutaannik nunatsinniittoqarnersoq qiviallaassavaat.
- Tamanna aningaasaliisartunut nunani allaneersunut Nunatsinni aningaasaliissanerlutik nalilersuineranni isumalipilussuussaaq, Bo Lidegaard oqarpoq.
Ataqqeqatigiinneq naligiinnerlu eqqarsaatigigaanni, Nunatta Danmarkillu imminnut attaveqatigiinnerat ataatsimut isigalugu pitsanngorsartariaqartoq, taanna isumaqarpoq.
Aamma atuaruk Dansk Industriimeersoq Karsten Dybvad Andap ataatsimeeqatigigaa
Taamaakkaluartoq Naalagaaffeqatigiiginnarnissaq kissaatigalugu qallunaallu inuussutissarsiortut aggersarsinnaasut Danmarkimut oqaatiginissaat, Naalakkersuisut akisussaaffigigaat, Bo Lidegaard isumaqarpoq.
- Qallunaat suliffeqarfiutaannik peqateqarneq - amerlasoorsuarnik aammalu aaqqissuussasumik taamaalioraanni pitsaanerpaassaaq - inuussutissarsiornerup siuariartulernissaanut iluaqutaassaaq. Aamma kalaallit sulisinnaasut piginnaasaqaleriartornerisigut inuussutissarsiornerup siuariartornera taamaalillugu immini sukkatsisalersinnaavoq, Politikenip aaqqissuisuunera oqarpoq.
Taassuma aamma ineriartortitsinermut aningaasaateqarfimmik pilersitsinissaq siullersuutigaa. Tassa Nunatta Danmarkillu aningaasaleeqatigiinnermikkut Nunatsinni aningaasaliinissaq isumagissammassuk.
Aamma atuaruk Kalaallit Nunaat issittumi teknologiimi siuttuussaaq
Aamma atuaruk Kielsenip Future Greenland paasissutissanik pingaarutilinnik pissarsiaqarfigaa
