FUTURE GREENLAND Kalaallit Nunaat issittumi teknologiimi siuttuussaaq
Kalaallit Nunaat issittumi teknologiimik aallussinermi nunarsuarmi siunissami siuttuussaaq, taamaammallu Sisimiuni issittumi ingeniøritut ilinniarfik allisarneqassaaq.
Danmarkimi teknikkilerinermik universiteti Namminersorlutik Oqartussallu ilinniarfiup allisarnissaanut piareeqqapput. Aningaasaliisartuniit aningaasanik taperneqarnissaq amingaatituaavoq. Aningaasassarsilertorsinnaallutilli, DTU-mi pisortaq Michael Faber oqarpoq.
Kalaallit Nunaat siuariartussappat ilinniartitaaneq pingaaruteqarluinnartuusoq, inuussutissarsiortut Future Greenlandimit taagorneqartumik ataatsimiinneranni eqqartorneqarpoq.
Danmarkimi teknikkikkut universitetip Namminersorlutik Oqartussat suleqatigalugit Sisimiuni issittumi ingerniøritut ilinniarfik allisarujussuarniarlugu ilinniagarlu qaffasinnerulersinniarlugu maanna ulappuseruttorlutik, universitetip pisortaata qulaarpaa.
Aamma atuaruk VIDEO Kielsenip Future Greenland paasissutissanik pingaarutilinnik pissarsiaqarfigaa
Atuarfik 125-it ilinniartoqalissaaq, taakkua siornatigornit 100-inik amerlanerussapput. Ilinniarnerup tamarmi Sisimiuni ingerlanneqarnissaa, siunissami periarfissaalissaaq. Ilinnarnerup affaa Danmarkimi maannakkumut ingerlanneqartarpoq.
Atuarfimmik allilerineq, DTU-p pisortaa naapertorlugu, issittumi teknikkimik suliaqarnermi nunarput siuttunut inissitsissavaa.
- Kivitsingaatsiarsinnaassangaluarpoq, Kalaallit Nunaannilu inuiaqatigiit attanneqarsinnaasumik inerikkiartornissaannut aallarnisaataasinnaassalluni. Nunarsuaq tamakkerlugu pissutsit massakkut isigigaanni, tamatumunnga assigusumik unammillertoqanngilaq. Tassalu ilinniagaq nunarsuarmi tamarmi immikkuullarissoq ineriartortinneqassaaq, tamannalu Kalaallit Nunaannut periarfissaassaaq kisiartaasoq.
Aamma atuaruk Future Greenland Halibuttip pisortaa: Ataatsimeersuarneq qallunaarpasippallaaqaaq
Maannakkut atuartut affai Kalaallit Nunaaninngaanneersuupput.
Atuartullu amerlanerulissasut, Michael Faber neriuppoq. Atuartulli amerlasuut nunanit allaninngaannersuussasut naatsorsuutigaa.
Kisianni imaattariaqanngilaq, ilinniartut nunani allaneersut ilinniakkaminnik naammassinnillutik nunarput qimappassut, tamanna Nunatta iluaqutiginngitsuussagaa. Michael Faber taama naliliivoq.
- Universitetini nunarsuaq tamakkerlugu taamaattarput. Atuartut nunanit allaninngaaneersut amerlasarput, naammassigaangamillu nunanut allanut ingerlaqqittarlutik. Kisiannili piffissap ingerlanerani uteqqittartut takussaaqaat. Aarlarsimasimariaraangamillu pikkorinnerulersimasarput. Misilittagarilersimasaallu iluaqutaalluinnartarput, Michael Faber oqarpoq.
Aamma atuaruk FUTURE GREENLAND Suliffeqarfiit namminersortut Kalaallit Nunaat siuariartortissavaat
